«Պաղպաղակում ռիսկերն ավելի բարձր են. պատկան մարմինը խոսեց հայտնաբերված վտանգից՝ չասելով վտանգի աղբյուր». Բաբկեն Պիպոյանը

Պաղպաղակն ու գազավորված զովացուցիչ ըմպելիքներն ամառային սեզոնի ամենաշատ սպառումն ունեցող սննդային ապրանքներն են։ Սպառողները մեծ մասամբ երեխաներն են, ուստի փորձեցինք մասնագետից պարզել՝ որքանո՞վ են դրանք անվտանգ, արդյոք դրանց անվտանգության նկատմամբ վերահսկողություն կա՞։

«Իրազեկ և պաշտպանված սպառող» ՀԿ ղեկավար Բաբկեն Պիպոյանի փոխանցմամբ՝ պաղպաղակը և զովացուցիչ ըմպելիքները չպետք է դիտարկել նույն ռիսկայնության մեջ։

«Պաղպաղակում ռիսկերն ավելի բարձր են, որովհետև կենդանական ծագման հումք է օգտագործվում և համարվում է բարձր ռիսկայնության մթերք։

Մենք տեսանք պաղպաղակի շուկայում լիազոր մարմնի ուսումնասիրությունը, նախ մենք ապրում ենք մի իրականության մեջ, երբ պետությունն ակնկալում է հետևյալը՝ «գործ  են անում, փոխանակ ասեք՝ ապրեք, ասում ենք՝ այս գործն այս ի՞նչ ձև եք արել»։ Պատկան մարմիններից խոսեցին, որ հայտնաբարել են պաղպաղակում վտանգ, սակայն չասացին վտանգի աղբյուրը։ Ինչո՞ւ եմ այսպես ասում, որովհետև այն նույն խնդիրները, որոնց մասին իրենք խոսում էին, դրանք կարող էին պայմանավորված լինել ամենատարբեր գործոններով։ Սկսած հումքից՝ վերջացրած արտադրամասում սանիտարական վիճակով, իսկ ամենառիսկայինը կանոնների չպահպանումն է, այսինքն՝ հոսքագծերը կարող են աշխատել առանց ախտահանվելու՝ հասցնելու այն ծավալները, որոնք հարկավոր են շուկային։ Եթե, օրինակ, հոսքագծերը չախտահանելու արդյունքում կան հետևանքներ, մի օր կկանչեն տեսուչներին, հոսքագիծը կախտահանեն, կաշխատեն, բայց հաջորդ օրը նորից չեն ախտահանի, արդյունքում՝ կլինի նույն խնդիրը»,- 168.am-ի հետ զրույցում նշեց Բաբկեն Պիպոյանը։

Նրա դիտարկմամբ՝ պատկան մարմինն իրականում աշխատանք իրականացրեց ոչ թե սննդի անվտանգությունն ապահովելու, այլ հերթական «պտիչկան» ստանալու համար, թե՝ «տեսեք, պաղպաղակի շուկան ստուգել ենք, ոչ ոք չասի, թե չենք ստուգել»։

«Այն հաղորդակցությունը, որը տեղի ունեցավ դրա հետ կապված, ոչ թե պաշտպանում էր մարդուն, սպառողին, այլ գովում էր լիազոր մարմնին։ Ասել եմ, հիմա էլ կրկնում եմ՝ սննդամթերքի անվտանգության ոլորտում ռիսկերի հաղորդակցումը պետք է ունենա սպառողակենտրոն մոտեցում և ակնկալի նաև սպառողի վարքագիծը։ Մասնավորապես ի՞նչ անի սպառողը՝ ի՞նչ գնել, ինչի՞ց հրաժարվել, ինչի՞ց չհրաժարվել և այլն։

Տեղեկատվությունն այնքան մանրամասն ու հիմնավորված պետք է լինի, որ կարողանա բոլորին ճիշտ ուղղորդել։ Իսկ լիազոր մարմնի տարածած տեղեկատվությունն այնպիսին էր, որ անգամ մենք էինք ապակողմնորոշված՝ ինչ խորհուրդ տալ սպառողին։ Իհարկե, կա նախազգուշավորության սկզբունք՝ այն, ինչ չգիտեին, ասում էինք՝ գոնե իմացեք, ինչը չգիտեք, մի՛ օգտագործեք, մինչև իմանանք»,- շեշտեց Բաբկեն Պիպոյանը։

Նա նաև հավելեց՝ պաղպաղակ արտադրող ընկերությունների մոտավորապես 95 տոկոսի մոտ եղել է խնդիր, այնպես չէ, որ մեկում կամ երկուսում է եղել։ Ավելին՝ այդպես էլ հասարակությունը և փորձագետները չիմացան՝ քանի՞ կիլոգրամ պաղպաղակ ոչնչացվեց ստուգումներից հետո։

«Սա եկավ ապացուցելու, որ լիազոր մարմինը ոչ թե սպառողի իրավունքն էր պաշտպանում, այլ սեփական փիառն էր ապահովում, որ՝ տեսեք, գործ ենք անում։ Մենք չգիտենք՝ այդ նույն ապրանքն այլ փաթեթավորմամբ այսօր շուկայո՞ւմ է, թե՞ չէ։ Եթե 1 տոննա ոչնչացրած լինեին, հավեսով լրագրողներին կհրավիրեն ու այդ ոչնչացումը տեսախցիկների առջև կապահովեին»,- նշեց Բաբկեն Պիպոյանը։

Ինչ վերաբերում է գազավորված ըմպելիքներին, «Իրազեկ և պաշտպանված սպառող» ՀԿ ղեկավարն ասաց, որ տեղեկություններ չունեն, թե շուկայում ինչ ուսումնասիրություններ են տեղի ունեցել, սակայն նշեց, որ այստեղ գործ ունեն ավելի շատ դրանց սխալ օգտագործման հետ։

«Այստեղ պետք է գործեր ոչ թե Սննդամթերքի անվտանգության ծառայությունը, այլ Առողջապահության նախարարությունը։ Ես տեսել եմ, որ Առողջապահության նախարարությունը հանրային առողջապահական հարցերով սկսում է զբաղվել և այդ մասին հիշել, երբ ունենում է գրանտային ծրագիր։

Օրինակ, կարող է վաղը պարզվել, որ մեր երկրում հենց այս պահին աղն ավելի կարևոր է, քան դրա խորհուրդը՝ ինչքան օգտագործենք, ինչպես օգտագործենք ու պահպանենք ճիշտ, կամ ինչպես, օրինակ, արևի տակ դրված ապրանք չգնենք և այլն»,- ընդգծեց Բաբկեն Պիպոյանը։