Օլիմպիական չեմպիոնուհուն ձերբակալել են սիրեցյալի վրա հարձակվելու համար
Ամերիկացի օլիմպիական չեմպիոնուհի, վազորդ Շա’Քարի Ռիչարդսոնին ձերբակալել են սիրելիի վրա հարձակում կատարելու կասկածանքով։ Այս մասին հաղորդում է Associated Press-ը։
Պատահարը տեղի է ունեցել հուլիսի 27-ին Սիեթլ-Թակոմա օդանավակայանում։ Ոստիկանները պատմել են, որ մարզուհին վիճել է սպրինտեր Քրիստիան Քոուլմանի հետ։ Տեսանկարահանող սարքերի կադրերում երևում է, թե ինչպես է Ռիչարդսոնը վերցնում Քոուլմանի ուսապարկը, այնուհետև փակում է նրա ճանապարհը, երբ վերջինս փորձում էր նրան շրջանցել։ Նա նաև ականջակալներ է նետել մարզիկի ուղղությամբ։
Ռիչարդսոնը Փարիզի 2024թ․ օլիմպիական խաղերում 4×100 մետր էստաֆետում դարձել է ոսկե մեդալակիր։ Նա ունի նաև արծաթե մեդալ անհատական վազքում։
2021 թվականին Տոկիոյի Օլիմպիադայից առաջ ամերիկուհին տապալել էր դոպինգ-թեստը։ Պարզվել էր, որ նա օգտագործել է մարիխուանա, ինչի պատճառով նրան արգելել էին մասնակցել Օլիմպիական խաղերին։
