Սոն Հյուն Մինը հեռանում է «Տոտենհեմից»՝ 10 տարի ակումբում անցկացնելուց հետո
Հարավկորեացի հարձակվող Սոն Հյուն Մինը, «Տոտենհեմում» 10 տարի անցկացնելուց հետո, հայտարարել է ակումբից հեռանալու որոշման մասին։ Ֆուտբոլիստն այդ մասին հայտարարել է Սեուլում կայացած մամուլի ասուլիսի ժամանակ՝ նախքան «Նյուքասլի» հետ բարեկամական հանդիպումը։
«Մինչ մամուլի ասուլիսը սկսելը, ցանկանում եմ հայտնել, որ որոշում եմ կայացրել այս ամառ հեռանալ ակումբից։ Ցանկանում եմ նշել, որ ակումբն աջակցում է ինձ այս հարցում:
Սա իմ կարիերայի ամենադժվար որոշումն էր։ Շատ հրաշալի հիշողություններ եմ ունեցել, սակայն ինձ անհրաժեշտ է նոր միջավայր, որպեսզի շարունակեմ զարգանալ։ Ինձ մի փոքր փոփոխություն է պետք. 10 տարին մեծ ժամանակահատված է։ Ես Հյուսիսային Լոնդոն ժամանեցի դեռ որպես երեխա, ընդամենը 23 տարեկան էի, շատ երիտասարդ էի։ Իսկ այս ակումբից հեռանում եմ որպես հասուն տղամարդ, շատ հպարտ մարդ։ Ցանկանում եմ շնորհակալություն հայտնել «Տոտենհեմի» բոլոր երկրպագուներին՝ այն սիրո համար, որ ցույց եք տվել ինձ։ Հուսով եմ, որ բոլորը կհասկանան ու հարգանով կվերաբերվեն իմ որոշմանը:
Դժվար էր այդ մասին խոսել թիմակիցների հետ, քանի որ նրանց հետ ավելի շատ ժամանակ ես անցկացնում, քան ընտանիքիդ։
Արդեն բավականին ժամանակ է անցել այն պահից, ինչ ես ընդունել եմ ակումբից հեռանալու որոշումը։ Վերջին օրերը բարդ էին։ Դժվար էր արտաքուստ ուրախ երևալ, բայց ամեն ինչ անում էի, որ չվնասեմ ակումբին կամ թիմակիցներիս։ Թեև որոշումը կայացված է, ցանկանում եմ այս երկու վերջին օրերին լավ հիշողություններ ստեղծել երկրպագուների հետ»,- Սոնի խոսքերը մեջբերում է ակումբի պաշտոնական կայքը։
Սոն Հյուն Մինը հանդես է եկել «Տոտենհեմի» կազմում 2015 թվականից։ Այդ ընթացքում նա միայն մեկ տիտղոս է նվաճել՝ Եվրոպայի Լիգայի գավաթը՝ 2025 թվականին։ Ավելի վաղ հաղորդվել էր, որ հարձակվողին պաշտոնական առաջարկ է ներկայացրել «Լոս Անջելես» ակումբը։ Կորեացու և «Տոտենհեմի» միջև պայմանագրի ժամկետին ավարտին դեռ մեկ տարի կա:
