Հայկ Սարգսյանի նախագիծն ունի հարցեր, և դրանք քննարկվում են. Ալեն Սիմոնյան
Ազգային ժողովի (ԱԺ) նախագահ Ալեն Սիմոնյանը լրագրողների հետ զրույցում անդրադարձել է իշխանական պատգամավոր Հայկ Սարգսյանի՝ բանակին առնչվող օրենսդրական փաթեթին և մայիսի 27-ին ԱԺ պաշտպանության և անվտանգության հարցերի մշտական հանձնաժողովում դրա քննարկման չեղարկմանը.արդյո՞ք հանրային արձագանքը նշանակություն ունեցավ:
«Հանրային արձագանքը միշտ նշանակություն ունի, քննարկումները շարունակվում են: Կարծում եմ, որ օրենքը միգուցե որոշ փոփոխությունների կարիք կարող է ունենալ, բայց անհրաժեշտություն է՝ ՀՀ անվտանգությունն ապահովելու համար: Վերջնանպատակը մեր երկրի համար պետք է լինի լիակատար պրոֆեսիոնալ բանակը, որտեղ կծառայեն մարդիկ, ովքեր դրան կվերաբերvեն որպես մասնագիտություն՝ ամենայն պատասխանատվությամբ: Եվ այն իրավիճակը, որ մեր երկրում եղել է և կա արդեն տասնամյակներ շարունակ, պետք է ինչ-որ ձևով սկսել կարգավորել»,-նշել է նա:
Դիտարկմանը՝ աղքատների բանա՞կ եք ստեղծում, Ալեն Սիմոնյանն արձագանքել է. «Ես աղքատ չեմ եղել, բայց բանակ գնացել եմ: Նախագծի բովանդակությանը չեմ անդրադառնա: Բայց էն մարդիկ, ովքեր փորձել են գումարով իրենց երեխաներին ազատել բանակից, դա արել են, և նոր որակում տալու կարիք չկա: Դրա դեմ պայքար նույնպես տարվում է և տարվելու է: Բայց նախագիծն ունի հարցեր, և դա քննարկվում է»:
ԱԺ նախագահը սակայն չասաց՝ որտե՞ղ է հարուստ լինելով՝ ծառայել:
Ալեն Սիմոնյանի նաև հետաքրքրվեցին՝ լավ չէ՞ր լինի այս երևույթի դեմ պայքար լիներ, իրավապահ համակարգն աշխատեր, ինչին ի պատասխան՝ Ալեն Սիմոնյանը նշել է, որ բոլոր իշխանություններն այդ փորձերն արել են, գնացել են այդ ուղղությամբ, բայց իրենց նպատակը պրոֆեսիոնալ բանակ ունենալն է:
Ավելի ուշ Ալեն Սիմոնյանը շրջանառության մեջ դրված փաթեթին առնչվող կրկնվող հարցին ի պատասխան՝ դարձյալ հիշեցրել է, որ հարուստները փողով իրենց երեխաներին ազատել են, իսկ մյուսները գնացել են ծառայել, և որ ինքն էլ ապահովված ընտանիքից լինելով, ծառայել է, իհարկե, դարձյալ չի ասվել՝ որտեղ և ինչպես:
Սեպտեմբերին լինելու է ՔՊ վարչության ընտրությունները, նոր մարդիկ են լինելու, կանանց քվոտան մեծացվելու է
Աժ նախագահ Ալեն Սիմոնյանից այսօր լրագրողները հետաքրքրվեցին՝ իշխող կուսակցությունը պատրաստվո՞ւմ է ԱԺ ընտրություններին, ինչին նա պատասխանել է.
«Սեպտեմբերին լինելու է ՔՊ վարչության ընտրությունները: Մրցավազքը դեռ չի սկսվել պաշտոնապես, գործընկերներն ակտիվ են և ավելի շատ են ակտիվանալու, ներկուսակցական հանդիպումներ են անցկացնելու, որը նորմալ է: Վստահ եմ՝ շատ նոր մարդիկ են լինելու: Չգիտեմ՝ իրավունք ունե՞մ ասելու, թե՞ ոչ, բայց կասեմ, ինչ լինի՝ լինի, մենք նաև կանանց քվոտան ենք մեծացրել: Վարչության կազմում կանանց ներգրավվածությունը շատ ավելի մեծ պետք է լինի: Իսկ ընտրություններին մենք շատ վաղուց ենք պատրաստվում»:
Հարցին՝ ինչո՞ւ են կանանց քվոտան ավելացրել, քանի որ ավելի կառավարելի՞ են, Սիմոնյանը ժպտալով արձագանքել է. «Կանանց չի լինում կառավարել, նրանք են ավելի հեշտ կառավարում»։
Իսկ Ալեն Սիմոնյանին լրագրողները հիշեցրել են, որ ինքը Ռուսաստանին մեղադրում է Հայաստանի դեմ հիբրիդային պատերազմ վարելու մեջ, Միութենական պետության մեջ մտցնելու, բայց երբ ՌԴ ԱԳ նախարար Սերգեյ Լավրովը Երևանում էր, ՀՀ ԱԳ նախարար Արարատ Միրզոյանը բավական զգուշավոր էր, ասում էր՝ ՀԱՊԿ-ում ենք մնալու, դաշնակցային հարաբերությունները վերաֆորմատավորելու կարիք չկա, ինչին ի պատասխան՝ Սիմոնյանը նշել է՝ ՀՀ ԱԳ նախարարն ասել է այն, ինչ գտնում է ճիշտ:
«ՀԱՊԿ-ում ՀՀ անդամակցությունը սառեցված է, ինչ վերաբերում է ՀԱՊԿ-ում մնալուն, անկեղծ ասած, չեմ լսել, որ Արարատ Միրզոյանը նման բան ասած լինի: Մինչև այս պահը չեմ հանդիպել: Կարծում եմ՝ նոր ասելիք չկա, ինչ-որ հրապարակային է եղել՝ դա է։ Մեր թիմի մեջ հակասություն չկա, բացարձակ չկա, բոլոր հարցերը միասին քննարկում ենք։ Պարոն Միրզոյանն ԱԳ նախարարն է և դիվանագիտության պատասխանատուն է և կարող է լինել շատ ավելի դիվանագետ, զսպված։ Իսկ ես քաղաքական մարմնի ղեկավար եմ, կարող եմ ազատ քաղաքական հայտարարություններ անել և իմ բնավորությանը բնորոշ շատ ավելի կտրուկ եմ»,- հավելել է նա։
ԱԺ նախագահ Ալեն Սիմոնյանը լրագրողների հետ զրույցում ասել է, որ ակնհայտ է ՀՀ երկրորդ նախագահ Ռոբերտ Քոչարյանի կապը Ռուսաստանի հետ
«Նույնիսկ իր հարցազրույցի մեջ շատ հետաքրքիր բան է անում, հարցնում են, թե ի՞նչ կարծիք ունի Միութենական պետության մասին, ասում է՝ նմանատիպ բան չեմ ասել, սակայն շարունակում է բոլոր հնարավոր ձևերով ապացուցել և ներկայացնել այդ պետությունը, սխալ զուգահեռներ անցկացնել ԵՄ-ի հետ»,- շեշտել է նա և պնդել՝ իրենք ո՛չ արևմտամետ են, ո՛չ էլ ռուսամետ՝ «չի կարելի լինել միայն ռուսամետ, չի կարելի լինել միայն արևմտամետ»:
«Այն հարցադրումները, որ կան մեր ռուս գործընկերներին, դրանք օրակարգից դուրս չեն եկել՝ ո՞րն է ՀԱՊԿ-ի սահմանը, ինչո՞ւ է ՀԱՊԿ-ը նույնիսկ քաղաքական մակարդակում իրեն հեռու պահել»,- ասել է ԱԺ նախագահը և շարունակել,- «Ինչ-որ մարդիկ ուզում են անընդհատ ինչ-որ աթոռների վրա նստել, կամ դրանք վերադարձնել ու էլի նստել: Չեն նստելու իրենք աթոռների վրա, իրենք նստելու են բանտում, դա ժամանակի հարց է: Իսկ այն երկրները, որոնք ամբողջությամբ մի քաղաքական գիծ են վարում, նման երկրները դադարում են գոյություն ունենալ: Քաղաքական առումով այդ երկրները դառնում են ծայրագավառներ և դադարում են գոյություն ունենալ: Դրա համար պիտի բալանսավորել»:
Ալեն Սիմոնյանին հարց է ուղղվել նաև ԱՄՆ պետքարտուղար Մարկո Ռուբիոյի դիտարկման հետ կապված, որ Հայաստան-Ադրբեջան հակամարտության իրական ռիսկ կա, որն իրենք փորձում են կանխել, ԱԺ նախագահն առաջարկել է ՀՀ պաշտպանության նախարար Սուրեն Պապիկյանից ճշտել՝ կա՞ն տեղաշարժեր, քաղաքական առումով նման բան չի տեսնում, և ոչինչ, որ Հայաստանը կոչում է «Արևմտյան Ադրբեջան»:
«Մենք էլ ենք, չէ՞, տարածքային պահանջ դնում, երբ, օրինակ, Ղարաբաղի ներկայացուցիչները նոր նախագահ են ընտրում իրենց համար, հետո ինչ-որ հայտարարություններ են անում, մենք դա չենք նկատում, բայց դրան ի պատասխան՝ Ադրբեջանի արած քայլերին ասում ենք՝ տեսա՞ք՝ ինչ ասեց: Ասում եմ՝ Ղարաբաղի ներկայացուցիչները հայտարարում են, որ նոր Ազգային ժողովի նախագահ են ընտրում, Ադրբեջանի նախագահն էլ ասում է՝ ես էլ հես ա կգամ, կմտնեմ «Արևմտյան Ադրբեջան» կհիմնադրեմ, բա մի մասը նկատում եք, այն մյուսը…»,- նշել է նա:
Հարցին՝ համեմատությունը տեղի՞ն էր, Սիմոնյանը պատասխանել է՝. «Իհարկե տեղին է»:
Ճշտող հարցին՝ բայց Հայաստանի տարածքում եղե՞լ է «Արևմտյան Ադրբեջան», ԱԺ նախագահն ասել է.
«Ախր հայկական մոլորակից դուրս եկեք: Այո՛, չի եղել ու չի էլ կարող լինել: Ասեմ ավելին՝ հարցը դա չի, բայց ինքը հայելային պատասխանում է, իմ ասածը դա է: Նորից եմ ասում՝ դուք պետք է հասկանաք, որ բացի մեր ընկալումներից, որոնք ճիշտ են, սխալ են կամ այլ ձևի են, իրենք էլ այդ ձևով են պատասխանում: Իմ ասածը հետևյալն է, որ այդ քայլերը, այդ հայտարարություններն իր հայելային արձագանքն է, այդքան բան։ Հիմա ես չգիտեմ, ինքը կարող է մի օր ուրիշ բան ասի, ես ասում եմ՝ ինչի է ինքը դա անում, ես չեմ ասում՝ որն է ճիշտ կամ սխալ»:
Ինչ վերաբերում է դիտարկմանը, որ մինչև Արցախի խորհրդարանի նախագահի ընտրությունն էլ այդ «Արևմտյան Ադրբեջան»-ի արտահայտությունները կային, և, որ Սիմոնյանը պարզապես փորձում է սլաքները տանել արցախցիների կողմ, ԱԺ նախագահը չի համաձայնել՝ «ո՛չ, ո՛չ, ո՛չ, ո՛չ, ո՛չ, սխալ եք»:
«Դուք սխալ եք, խնդիրը կայանում է նրանում, որ ինքը հիմա փորձում է ու մշտապես փորձել է նույն բաները, ինչն, իր ընկալմամբ, արել ենք մենք, անի մեզ հետ: Հիմա այստեղ իրականում մենք իրար հետ վեճ չունենք ու չենք կարող ունենալ, ես որևիցե կողմի չեմ պաշտպանում, ես ասում եմ՝ ինչի է ինքը դա անում: Ինքը որոշել է, որ եթե մենք արդարացիորեն, բոլոր փաստերով ասում ենք՝ Ղարաբաղ, ինքը պիտի ասի՝ «Արևմտյան Ադրբեջան», այսքան բան: Ես ճիշտ եմ ասում: Ես ասում եմ՝ չի՞ եղել Լեռնային Ղարաբաղ, ես ասում եմ՝ ինքը ինչի է դա անում, մերվեք էդ մտքի հետ: Թարգեք ձև անել, որ կա Հայաստանը՝ իր պատմության գրքով, և մնացած բոլորը ոչ կարևոր ժողովուրդներ են: Մենք՝ հայերս, երբ դուդուկ էինք նվագում և ծիրան էինք աճեցնում, իրանք ծառերի վրա էին: Թարգեք էդ մոտեցումը, մի ոչնչացրեք Հայաստանի Հանրապետությունը, ՀՀ ապագան, սխալ բան եք անում: Հասկացեք, որ կարողանաք հաղթել մեր պոտենցիալ հակառակորդին: Երբ որ մենք Սուրբ Աստծո կողմից, Մաշտոցի կողմից գրված Արարատ սարը՝ տենց հետևից լույսը գցած մեր վրա, Նոյի ժողովուրդս՝ 1700 տարի առաջ քրիստոնեություն ընդունած, տենց բան ենք ասում, ինքն էլ ասում է՝ ես էլ ձեզ սրանով կպատասխանեմ»,- շարունակել է ՀՀ ԱԺ նախագահը:
ԱԺ նախագահ Ալեն Սիմոնյանը լրագրողների հետ զրույցում նաև ասել է, թե ինչպես են իրենք պատկերացնում Խաղաղության պայմանագրից հետո իրավիճակը:
«Խաղաղության պայմանագիրը կնքելուց 5 րոպե հետո ՀՀ բնակիչները և Ադրբեջանի բնակիչները սկսելու են իրար հետ առևտուր անել, բոլոր հնարավոր ձևերով կոմունիկացվել և շփվել: Հասարակություններին պետք է պատրաստել դրան։
Ես հավատում եմ՝ եթե կամք լինի իրենց կողմից, մեր հասարակությունները կապրեն իրար հետ, ասում եմ՝ առևտուր են անելու: Ղարաբաղի շրջափակման ժամանակ նույնիսկ առևտուր է եղել, անուններ չտամ: Ղարաբաղի որոշ ներկայացուցիչներ կոնյակ են վաճառել, փող են վերցրել։ Վերջացրե՛ք, մի ապրեք հեքիաթների մեջ, որ առևտուր չի լինելու, պատ ենք կառուցելու և իրար բարև չտանք»,- շեշտել է նա:
