Կիսում եմ ձեր մտահոգությունը. ճիշտ կլինի, եթե Հ1-ով գերիների թեման լուսաբանվի. ՀՌՀ նախագահ
Օրենսդրական խախտում չէ, սակայն ճիշտ կլինի, եթե Հանրային հեռուստաընկերությունը Բաքվում պահվող հայ գերիների թեման լուսաբանի։ Այդ մասին Ազգային ժողովում լրագրողների հետ զրույցում ասաց Հեռուստատեսության և ռադիոյի հանձնաժողովի նախագահ Տիգրան Հակոբյանը։
Նա անդրադարձավ լրագրողի այն դիտարկմանը, որ Հանրային հեռուստաընկերությունը համառորեն չի անդրադառնում Բաքվում պահվող հայ գերիների, Ռուբեն Վարդանյանի և Արցախի մյուս ռազմաքաղաքական ղեկավարության, այսպես կոչված, դատավարությանը։ Ի՞նչ կարծիք ունի Հակոբյանն այս հարցում և ինչո՞ւ ՀՌՀ–ն չի անդրադառնում Հանրային հեռուստաընկերության այն գործելաճին։
«Ես գիտեմ այդ խնդիրը, կիսում եմ ձեր մտահոգությունը, սակայն ուզում եմ հասկանանք բոլորիս լիազորությունների սահմանները. Հանրային հեռուստաընկերությունն ունի իր կառավարման մարմինը` Հանրային հեռարձակողի խուրհուրդը։ Մենք իրենց բովանդակային վեճերի մեջ մտնելու իրավունք չունենք։ Մենք ընդհանրապես խմբագրական քաղաքականությանը միջամտելու իրավունք չունենք»,- հայտարարեց Հակոբյանը։
Նրա խոսքով` հանձնաժողովի իրավունքը սահմանափակվում է օրենսդրությամբ, իսկ օրենսդրության մեջ նշված չէ, որ այս կամ այն հեռուստաընկերությունը պարտավոր է այս կամ այն բանը ցույց տալ։
«Մենք որևէ լծակ չունենք։ Դա խախտում չէ, սակայն շատ ճիշտ կլինի, եթե ամեն ինչը լուսաբանվի»,- ընդգծեց ՀՌՀ նախագահը։
Հիշեցնենք՝ Ադրբեջանը ընդունել է, որ Բաքվում 23 հայ գերիներ կան։ Ոչ պաշտոնական տվյալներով՝ նրանց թիվը ավելի շատ է։
