Շատ ինտենսիվ քննարկումներ են ընթանում. Բոլոր սցենարները քննարկվում են, բացի մեկից. Խաչիկ Գալստյան․ «Փաստինֆո»
Ես բացառում եմ Գյումրիում ՔՊ-ի վերարտադրությունը՝ մեր լռության, գործողությունների կամ անգործության պատճառով, բացառված է, անհնարին բան է։ Այս մասին «Փաստինֆո»-ի հետ զրույցում ասաց «Հայրենիք» կուսակցության գործադիր մարմնի անդամ Խաչիկ Գալստյանը։
«Լռություն կա, որ կյանք արժե, պետք է սպասել, ծանր ու թեթև անել, որից հետո նոր որոշում կայացնել։ Մենք ունենք ժամանակ և այդ ժամանակի մեջ հաստատ որոշումը կկայացվի և կհրապարակվի։ Իմ անունից հայտարարում եմ՝ «Քաղաքացիական պայմանագիր» կուսակցության հետ համագործակցությունը ինձ համար այն կարմիր գիծն է, որը վստահ եմ, որ ոչ «Հայրենիք» կուսակցությունը, ոչ էլ Մարտուն Գրիգորյանը չի պատրաստվում հատել։ ՔՊ-ն Գյումրիում իշխանություն վերցնելու շանս չի ունենալու, ես բացառում եմ»,- ընդգծել է գործիչը։
Հարցին՝ հնարավոր է, որ երկրորդ փուլ տեղի ունենա՝ Գալստյանը պատասխանեց, որ նույնիսկ երկրորդ փուլի անցկացման, նույնիսկ երրորդ, չորրորդ փուլերով՝ այս իրավիճակով, այս ուժերի դասավորվածությամբ ՔՊ-ի վերարտադրությունը բացառված է, բացառված է, որ մեր ձեռամբ ՔՊ-ն Գյումրիում իշխանություն վերցնի։
«Այժմ շատ ինտենսիվ քննարկումներ են ընթանում, բոլոր սցենարները քննարկվում են, բացի մեկից՝ ՔՊ վերարտադրությունից, բոլոր սցենարները կյանքի կոչվելու հավանականություն դեռ ունեն։ Հանգիստ կքննարկենք և որոշումը կհրապարակենք»,- նշեց նա։
