Զարմանալի է, որ Ալիևն ասում է, թե հայկական կողմի նկատմամբ վստահությունը զրո է, իրականում հակառակն է. Սիմոնյան
Ալեն Սիմոնյանը կարծում է, որ Ադրբեջանի ՊՆ-ի կողմից նախորդող օրվա ընթացքում 3 անգամ տարածված ապատեղեկատվությունը դեռևս բավարար հիմք չէ պնդելու, որ Հայաստանի և Ադրբեջանի միջև հարաբերությունների կարգավորման գործընթացն անհաջողություն ունի։ Այս մասին նա այսօր ասաց ԱԺ-ում լրագրողների հետ ճեպազրույցի ժամանակ։
«Կարծում եմ՝ դա արվել է Ադրբեջանի նախագահի հայտարարությունն արդարացնելու համար, երբ ասել էր, որ հայկական կողմի նկատմամբ 0-ին մոտ վստահություն կա»,- նշեց Սիմոնյանը։
Նրան միաժամանակ զարմացրել է Ադրբեջանի նախագահի հայտարարությունը՝ հաշվի առնելով նաև այն հանգամանքը, որ համաձայնագրի տեքստի համաձայնեցման մասին հայտարարությունն էլ այլ բան է ցույց տալիս։ Հիշեցնում է նաև, որ ընդդիմադիր պատգամավորներն էլ մշտապես իշխանություններին մեղադրում են, թե Ադրբեջանի նախագահն ինչ ասում է, իշխանությունները դա անում են։
«Որոշեցինք, որ Պն-ն հայտարարություն անի, բայց ֆիքսենք, որ նաև եվրադիտորդներն են նույն հայտարարությունն արել, որ նման բան տեղի չի ունեցել և կրակոցներ չեն եղել»,- ասաց Սիմոնյանը։
Ինչ վերաբերում է այն հարցին, թե արդյոք խաղաղության պայմանագրի ստորագրումից հետո, երբ հայ-ադրբեջանական սահմանին ԵՄ դիտորդներ այլևս չեն լինի, չի՞ դիմի արդյոք Ադրբեջանը նոր ագրեսիայի, Սիմոնյանը նշեց՝ եթե Ադրբեջանը Հայաստանի վրա հարձակվելու լինի, ապա եվրադիտորդների ներկայությամբ էլ կհարձակվի։
