Մոսկվայում հոգնել են Նիկոլի «նեյնիմ-նեյնիմ»-ներից. չեն պատրաստվում սուբսիդավորել Փաշինյանի եվրոպական ֆանտազիաները. Արմեն Աշոտյան
«5 հարց» հարցուպատասխանի շրջանակում քաղաքացիները շարունակում են հարցեր ուղղել քաղբանտարկյալ, ՀՀԿ փոխնախագահ Արմեն Աշոտյանին, որոնց պատասխանները նա մեզ է հասցնում փաստաբանների միջոցով:
Հարց. «Համաձա՞յն եք, որ Ռուսաստանի Դաշնությունից վերջերս հնչող գնահատականները, կարծես, յուղ են լցնում փաշինյանական հակառուսական քարոզչության վրա»։
Արմեն Աշոտյան. Ակնհայտ է, որ Մոսկվայում ընդհանուր առմամբ հոգնել են Նիկոլի քաղաքականության մասին «նեյնիմ-նեյնիմ» անելուց։
Մյուս կողմից տեսանելի է, որ պաշտոնական Մոսկվան բազմաշերտ արձագանքներ է տալիս։ ՌԴ նախագահի աշխատակազմը՝ ամենահավասարակշռված և դիվանագիտական։ ՌԴ կառավարությունը՝ հետևանքների մասով ամենակոնկրետ և բաց։ ՌԴ ԱԳՆ-ն՝ անհաջող կերպով շրջանառելով կամ կրկնելով ադրբեջանական նարատիվները։ Իսկ խորհրդարանական և քարոզչական մակարդակներում՝ ամենամտահոգ և ագրեսիվ։
Հայ-ռուսական հարաբերություններում խորացող ճգնաժամը գնալով անկառավարելի է դարձնում տեղեկատվական-քաղաքական խոսույթը, ինչը հղի է անդառնալի հետևանքներով թե՛ երկկողմ հարաբերությունների, թե՛ Հայաստանի անվտանգության համար։
Կարճ ասած՝ Մոսկվան չի պատրաստվում սուբսիդավորել Փաշինյանի եվրոպական ֆանտազիաները։
