Իմ վարչակազմը հեռանում է՝ հաջորդ վարչակազմին թողելով ավելի ամուր դաշինքներ ունեցող Ամերիկա. Բայդեն
ԱՄՆ հեռացող նախագահ Ջո Բայդենն ամփոփել է իր 4-ամյա պաշտոնավարման ընթացքում արտաքին քաղաքականության ձեռքբերումները՝ ներկայացնելով՝ ինչպես է իր նախագահությունն ազդել երկրի անվտանգության և արտերկրում ԱՄՆ հարաբերությունների վրա:
«Նոր մարտահրավերներ, անշուշտ, ի հայտ կգան գալիք ամիսներին և տարիներին, բայց նույնիսկ այդ դեպքում, ակնհայտ է, որ իմ վարչակազմը հեռանում է՝ հաջորդ վարչակազմին թողելով ավելի շատ ընկերներ, ավելի ամուր դաշինքներ ունեցող Ամերիկա:
Մեր հակառակորդներն ավելի թույլ են և ճնշման տակ: Ամերիկան, որը կրկին առաջնորդող է, միավորում է երկրները, սահմանում է օրակարգը, մյուսներին միավորում մեր ծրագրերի և առաքելությունների շուրջ: Միացյալ Նահանգները չորս տարի առաջվա համեմատությամբ հաղթում է համաշխարհային մրցույթում։ Ամերիկան ավելի ուժեղ է. Մեր դաշինքներն ավելի ուժեղ են, մեր հակառակորդներն ու մրցակիցները՝ ավելի թույլ։ Եվ մենք պատերազմ չենք գնացել, որպեսզի այս բաներն իրականություն դառնան», – ասել է Բայդենը՝ ելույթ ունենալով Պետքարտուղարությունում:
Բայդենը նաև ներկայացրել է իր տեսակետները արտաքին քաղաքականության առաջնահերթությունների վերաբերյալ առաջիկա տարիներին հաջորդ վարչակազմի օրոք. արդար և կայուն խաղաղություն Ուկրաինայում. երաշխավորում, որ Բաշար Ասադի տապալումը չի հանգեցնի ԴԱԻՇ-ի վերածնմանը, Իրանի կողմից միջուկային զենք ձեռք բերելու կանխում, Իսրայել-ՀԱՄԱՍ կոնֆլիկտի ավարտ:
