Մերկելը պաշտպանել է Մերցի թեկնածությունը Գերմանիայի կանցլերի պաշտոնում
Գերմանիայի նախկին կանցլեր և Քրիստոնեադեմոկրատական միության (ՔԴՄ) նախկին ղեկավար Անգելա Մերկելը Table.Media հրատարակությանը տված հարցազրույցում պաշտպանել է կանցլերի պաշտոնում ՔԴՄ-ի ներկայիս ղեկավար Ֆրիդրիխ Մերցի թեկնածությունն առաջիկա ընտրություններում։ Այդ մասին տեղեկանում ենք «ՌԻԱ Նովոստի» գործակալությունից:
«Հաջողություններ եմ մաղթում Ֆրիդրիխ Մերցին: Նա երկար ժամանակ աշխատել է կանցլերի պաշտոնում թեկնածու դառնալու նպատակին հասնելու համար: Եվ հուսով եմ, որ նա նաև լավ ընտրարշավ անցկացնելու բավարար ուժ կունենա», – ասել է Մերկելը:
Նրա կարծիքով՝ այժմ առաջին պլան են մղվում տնտեսական քաղաքականության հարցերը։«Ես նրան հաջողություն չէի ցանկանա, եթե համոզված չլինեի, որ նա դրա համար ամեն ինչ ունի», – հավելել է նախկին կանցլերը։
Մերկելի և Մերցի հարաբերությունները երկար ժամանակ լարված են եղել: Մերցը, որը 2000-ականների սկզբին գլխավորում էր ՔԴՄ/ՔՍՄ խմբակցությունը, Մերկելին պարտվեց կուսակցության ղեկավարի պաշտոնի համար պայքարում, ինչն, ի վերջո, հանգեցրեց նրա ժամանակավոր հեռանալուն քաղաքականությունից։
Ավելի վաղ Գերմանիայի խորհրդարանում պատգամավորների մեծամասնության ձայներով վստահությունից զրկվել է Գերմանիայի կանցլեր Օլաֆ Շոլցի կառավարությունը՝ դրանով իսկ ճանապարհ բացելով դեպի վաղաժամկետ ընտրություններ, որոնք կկայանան 2025 թ. փետրվարին։
