ԱՄՆ-ն գերազանցել է տոտալիտար պետության մասին Օրուելի պատկերացումները․ Լավրով
Վաշինգտոնը «տվել-անցել» է տոտալիտար պետության մասին «1984» հակաուտոպիական վեպի հեղինակ Ջորջ Օրուելի պատկերացումները։ Այս մասին հայտարարել է ՌԴ ԱԳ նախարար Սերգեյ Լավրովը Եգիպտոսի իր գործընկերոջ հետ համատեղ մամուլի ասուլիսի ժամանակ՝ մեկնաբանելով ԱՄՆ-ի կողմից ռուսական ԶԼՄ-ների դեմ հերթական պատժամիջոցները։
«Ջորջ Օրուելը շատ հարուստ երևակայություն և պատմական կանխազգացում ուներ։ Բայց, իհարկե, նա չէր էլ կարող պատկերացնել, թե ինչպիսին կլինի տոտալիտար պետությունը։ Նա նկարագրեց դրա որոշ ուրվագծեր, բայց չկարողացավ մինչև վերջ հասկանալ այդ տոտալիտարիզմի խորությունը, որը մենք այժմ տեսնում ենք այսպես կոչված կանոնների վրա հիմնված կարգի շրջանակներում: Նրան գերազանցել են Վաշինգտոնի ներկայիս ղեկավարները, որոնք պարզապես ճնշում են ցանկացած այլակարծություն», – ասել Է Լավրովը։
Ռուս նախարարի կարծիքով՝ ԱՄՆ-ի գործողությունները մաքուր տոտալիտարիզմ են։
ԱՄՆ ֆինանսների նախարարությունը սեպտեմբերի 4-ին հայտարարել է «Россия сегодня» մեդիախմբի և RT հեռուստաալիքի գլխավոր խմբագիր Մարգարիտա Սիմոնյանի, ինչպես նաև վերջինիս տեղակալներ Անտոն Անիսիմովի և Ելիզավետա Բրոդսկայայի նկատմամբ պատժամիջոցներ սահմանելու մասին: Նրանցից բացի, սև ցուցակում են հայտնվել RT տեղեկատվական հեռարձակման ղեկավար Անդրեյ Կիաշկոն, թվային մեդիա նախագծերի բաժնի ղեկավար Կոնստանտին Կալաշնիկովը և հեռուստաալիքի մի շարք այլ աշխատակիցներ:
ԱՄՆ պետդեպարտամենտը խստացրել է «Россия сегодня» մեդիա խմբի և նրա դուստր ձեռնարկությունների աշխատանքի պայմանները՝ նրանց համար սահմանելով «արտասահմանյան առաքելությունների» կարգավիճակ: Ինչպես նշված է արտասահմանյան առաքելությունների մասին օրենքում, նրանցից կպահանջվի ԱՄՆ-ում աշխատող անձնակազմի և նրանց գույքի մասին տեղեկացնել գերատեսչությանը:
Ամերիկյան իշխանությունները նաև հայտարարել են նոր քաղաքականության մասին, որը սահմանափակում է վիզաների տրամադրումը նրանց, որոնք գործում են իբր «Կրեմլի կողմից աջակցվող» լրատվամիջոցների անունից:
Ընդ որում, Պետդեպարտամենտը հրաժարվել է պարզաբանել, թե կոնկրետ ում վրա են անդրադարձել վիզային սահմանափակումները։ Մեկնաբանելով նոր պատժամիջոցները՝ Պետդեպարտամենտի պաշտոնական ներկայացուցիչը հայտարարել է, որ դրանք ուղղված չեն առանձին ռուս լրագրողներին, այլ սահմանափակումների տակ հայտնված կազմակերպությունների աշխատակիցների դեմ են, որոնք «զբաղվել են անօրինական գործունեությամբ»:
