Շվեդիա-Հայաստան խորհրդարանական բարեկամական խումբը ողջունել է Հայաստանի վերաբերյալ ԵՄ խորհրդի կայացրած որոշումները
Շվեդիայի խորհրդարանի (Ռիկսդագ) Շվեդիա-Հայաստան բարեկամական խումբը ողջունել է Եվրոպական խաղաղության հիմնադրամից Հայաստանին աջակցություն տրամադրելու և վերջինիս հետ վիզաների ազատականացման շուրջ երկխոսություն սկսելու վերաբերյալ Եվրոպական միության ընդունած որոշումները։ Այս մասին հայտնել է Շվեդիա-Հայաստան բարեկամական խմբի անդամ, Շվեդիայի խորհրդարանի պատգամավոր Էրիկ Հելսբորնը՝ հայտարարությունը հրապարակելով X-ի իր միկրոբլոգում։
Տարածված հայտարարության մեջ, անդրադարձ կատարելով հուլիսի 22-ին ԵՄ խորհրդի ընդունած վերոնշյալ որոշումներին, նշվում է, որ այս որոշումներն ընդհանուր արժեքների, սկզբունքների և բարգավաճման տեսլականի վրա հիմնված Հայաստան-ԵՄ գործընկերության շատ կարևոր նշաձող են հանդիսանում։
«Մենք՝ Շվեդիայի Ռիկսդագի Շվեդիա-Հայաստան բարեկամական խմբի անդամներս, ողջունում ենք ԵՄ խորհրդի որոշումները և շեշտում ենք Շվեդիայի աջակցությունը Հայաստան-ԵՄ գործընկերության խորացմանը, ինչպես նաև ընդգծում ենք Հայաստանին աջակցությունը շարունակելու ԵՄ-ի հանձնառությունը», – նշված է տարածված հայտարարության մեջ։
