Փոխանակման շրջանակներում Սլովենիայից ՌԴ վերադարձած Դուլցովների երեխաները չգիտեին, որ ռուս են․ Պեսկով
Կալանավորների փոխանակման շրջանակներում Սլովենիայից Ռուսաստան վերադարձած ամուսինների երեխաները չգիտեին, որ իրենք ռուս են, հայտարարել է Կրեմլի խոսնակ Դմիտրի Պեսկովը։
Նրա խոսքով՝ երեխաներն իրականության մասին տեղեկացել են Մոսկվա վերադարձող օդանավում։
«Երեկ ժամանած անօրինականների երեխաները միայն Անկարայից եկող ինքնաթիռում են իմացել, որ ռուս են, ռուսերեն չեն խոսում»,- լրագրողներին ասել է Պեսկովը։
Արտյոմ և Աննա Դուլցովները ձերբակալվել էին 2022 թվականի դեկտեմբերին՝ լրտեսության մեղադրանքով և անցած ամիս մեղավոր ճանաչվել՝ դատապարտվելով մեկ տարի յոթ ամիս ազատազրկման։
Զույգը երեխաների հետ էին Սլովենիա ժամանել Արգենտինայի անձնագրերով՝ Լյուդվի Գիշա և Մարիա Ռոզա Մայեր Մունյոս անուններով։
Սլովենիայի իրավապահները պարզել են, որ Դուլցովները ռուսաստանյան հատուկ ծառայությունների աշխատակիցներ են, նրանց հանձնարարված էր տեղեկություններ հավաքագրել էներգետիկ ոլորտի վերաբերյալ։
