ՆԱՏՕ-ն արդիականացնում է իր միջուկային զսպման միջոցները․ Ստոլտենբերգ
ՆԱՏՕ-ն չի ավելացնում իր միջուկային մարտալիցքերի քանակը, սակայն արդիականացնում է իր միջուկային զսպման միջոցները, այդ թվում՝ կրող ինքնաթիռները: Այդ մասին լրագրողներին հայտնել է ՆԱՏՕ-ի գլխավոր քարտուղար Յենս Ստոլտենբերգը ԱՄՆ նախագահ Ջո Բայդենի հետ հանդիպումից հետո։
«Միջուկային մարտագլխիկների քանակն ավելացնելու պլաններ չկան, մենք արդիականացնում ենք կրող ինքնաթիռները՝ հնացած ինքնաթիռները (F-16) փոխարինելով նոր՝ հինգերորդ սերնդի ինքնաթիռներով (F-35), և ԱՄՆ-ն արդիականացնում է իր մոտ տեղակայված սպառազինությունը», – ասել է Ստոլտենբերգը։
«ՆԱՏՕ-ն տասնամյակներ շարունակ ունեցել է միջուկային զսպման բաղադրիչ, դա նորություն չէ: Ուստի նորություն չէ, որ մենք այն արդիականացնում ենք», – հավելել է նա:
ՆԱՏՕ-ում կան, այսպես կոչված, միջուկային փոխանակման ծրագրեր, որոնց շրջանակներում ՆԱՏՕ-ի ոչ միջուկային 5 երկրներ ունեն ինքնաթիռներ, որոնք պատրաստվել են ամերիկյան միջուկային զենք օգտագործելու համար։ Այս ծրագրի մասնակիցներն են Գերմանիան, Իտալիան, Բելգիան, Նիդեռլանդները և Թուրքիան:
Բայդենի հետ հանդիպմանը Ստոլտենբերգը նաև նշել է, որ 2024 թվականին նախորդ տարվա համեմատությամբ Հյուսիսատլանտյան դաշինքի ռազմական ծախսերը կավելանան 18 %-ով, իսկ 23 երկիր իր ռազմական ծախսերը կհասցնի մինչև ՀՆԱ-ի 2 %-ի։
