ՖԱԹՀ-ը և ՀԱՄԱՍ-ը Պեկինում հանդիպման ընթացքում հաշտության հասնելու ձգտում են արտահայտել
Պաղեստինյան ՖԱԹՀ և ՀԱՄԱՍ շարժումների ներկայացուցիչները Պեկինում կայացած խորհրդակցություններում ցանկություն են հայտնել հասնել հաշտության՝ հանուն պաղեստինյան միասնության: Ինչպես տեղեկանում ենք ՏԱՍՍ գործակալությունից, ապրիլի 30-ին կայացած ճեպազրույցում այդ մասին հայտարարել է Չինաստանի արտգործնախարարության պաշտոնական ներկայացուցիչ Լին Ցզյանը։
Նա ասել է, որ չինական կողմի հրավերով մի քանի օր առաջ Պեկին են ժամանել ՖԱԹՀ-ի և ՀԱՄԱՍ-ի ներկայացուցիչները՝ «որպեսզի խորացված և անկեղծ երկխոսություն վարեն ներպաղեստինյան հաշտեցմանն աջակցելու շուրջ»։
Չինաստանի ԱԳՆ ներկայացուցիչը հավելել է, որ կողմերը համաձայնության են եկել՝ շարունակելու երկխոսությունը և ձգտելու պաղեստինյան միասնության շուտափույթ ձեռքբերման։
Լին Ցզյանը նաև նշել է, որ ՖԱԹՀ-ի և ՀԱՄԱՍ-ի ներկայացուցիչները «քննարկել են բազմաթիվ կոնկրետ հարցեր և հասել առաջընթացի»:
