Իսրայելը և «Հեզբոլլահ»-ը հայտնել են միմյանց հարվածներ հասցնելու մասին
Իսրայելցի զինվորականները գիշերը մի շարք նոր հարձակումներ են իրականացրել Լիբանանում շիաների «Հեզբոլլահ» կազմակերպության զինված թևի օբյեկտների վրա։ Այս մասին հաղորդել է բանակի մամուլի ծառայությունը։
Ըստ վերջինիս տեղեկատվության՝ գիշերը լիբանանյան կողմից արձանագրվել է հակատանկային հրթիռների երկու արձակում Իսրայելի հյուսիսի Հար Դով լեռան ուղղությամբ։ Այս հարվածի հետևանքով զոհվել է իսրայելցի քաղաքացիական անձ։
Ի պատասխան՝ Իսրայելի պաշտպանության բանակի (ԻՊԲ) տանկերն ու հրետանին կրակ են բացել հարձակումների աղբյուրների ուղղությամբ։ Նրանք գրոհել են Լիբանանի հարավի Շաբաա բարձունքների արձակման կայանքի վրա:
Ըստ ԻՊԲ-ի՝ այս հարվածից որոշ ժամանակ առաջ իսրայելական օդուժի կործանիչները հարվածել են «Հեզբոլլահ»-ի ենթակառուցվածքի օբյեկտներին Քֆար Շուբայի բլուրներում և Լիբանանի հարավի Մարկաբա բնակավայրի մերձակայքում։
Իր հերթին Al Mayadeen հեռուստակայանը հաղորդել է, որ «Հեզբոլլահ»-ի զինված կազմավորումները համազարկային կրակի հրթիռային համակարգերով գնդակոծել են Վերին Գալիլեայի իսրայելական բնակավայրերը։
Նշվում է, որ շիաների ջոկատներն առնվազն 10 հրթիռ են արձակել Իսրայելի տարածք, տեղի են ունեցել ուժգին պայթյուններ։ Կրակ է բացվել նաև Քֆար Շուբայի բարձունքի ուղղությամբ, որտեղ գնդակոծման տակ են հայտնվել իսրայելական բանակի դիրքերը Ռուվեյսաթում։ Ըստ հրապարակման՝ վիրավորներին փրկելու համար տարածքում վայրէջք է կատարել իսրայելական ուղղաթիռ։
Ավելի վաղ «Հեզբոլլահ»-ի ռազմատեղեկատվական ծառայությունը հայտնել էր շիա մարտիկների կողմից Էդ Դուհեյրի սահմանային կետի մոտ իսրայելցի զինվորականների խմբի վրա հարձակման մասին, ինչի հետևանքով չորս զինվոր վիրավորվել է։
