ՑԱԽԱԼ-ը պատերազմի սկզբից գրոհել է Լիբանանում և Սիրիայում «Հեզբոլլահի» ավելի քան 3450 թիրախները
Գազայի պատերազմի սկսվելուց ի վեր իսրայելական բանակը գրոհել է «Հեզբոլլահի» ավելի քան 3400 թիրախների վրա Լիբանանի հարավում և ավելի քան 50-ի՝ Սիրիայում, հայտնել է Իսրայելի պաշտպանության բանակի խոսնակ Դանիել Հագարին, տեղեկացնում է CNN-ը։
Հագարին մամուլի ասուլիսի ժամանակ հայտարարել է, որ Իսրայելը փորձում է «դադարեցնել «Հեզբոլլահի» զինամթերքի և հրթիռների մատակարարման շղթան», որոնք, ըստ նրա, «մաքսանենգ ճանապարհով տեղափոխվում են Իրանից Սիրիա, այնուհետև՝ Լիբանան»:
«Մենք հայտնաբերում ենք այդ բեռները և ոչնչացնում դրանք։ Դրանք ոչնչացվում են նախքան «Հեզբոլլահին» հասնելը: Մենք կշարունակենք գործել այնտեղ, որտեղ ներկա կլինի «Հեզբոլլահը»: Մենք կշարունակենք գործել Մերձավոր Արևելքում ամենուր, որտեղ անհրաժեշտ լինի»,- ասել է նա:
Հագարին նաև հայտարարել է, որ իսրայելական զինվորականները հոկտեմբերի 7-ից երեք դիվիզիա են տեղակայել լիբանանյան սահմանի երկայնքով՝ սովորական մեկ դիվիզիայի փոխարեն, որպեսզի փորձեն խափանել «Հեզբոլլահի» հնարավորությունները և պաշտպանել հյուսիսային Իսրայելի բնակիչներին:
«Վերջին չորս ամիսների ընթացքում, Գազայի պատերազմին զուգահեռ, մենք շատ ինտենսիվ մարտեր ենք մղում հյուսիսային ճակատում, որի նպատակն է փոխել անվտանգության իրականությունը, որպեսզի հյուսիսի բնակիչները կարողանան ապահով վերադառնալ իրենց տները: Մինչ այժմ մենք հարձակվել ենք ավելի քան 150 ահաբեկչական ստորաբաժանումների վրա և ոչնչացրել 200-ից ավելի ահաբեկիչների ու հրամանատարների»,- հավելել է նա։
