Հայաստանը նոր պայմաններ է առաջադրում Սյունիքով երթուղու բացման հարցում. չեն ցանկանում, որ ռուս սահմանապահներն այնտեղ տեղակայվեն. Լավրով
Արևմտյան երկրները չեն ցանկանում Հայաստանի և Ադրբեջանի միջև խաղաղ կարգավորման այն համաձայնագրերի իրականացումը, որոնք կնքվել են Ռուսաստանի միջնորդությամբ, Արևմուտքը միջամտում է հակամարտության կարգավորման գործընթացին։
Այսօր իր մեծ ասուլիսի ընթացքում ասաց ՌԴ արտգործնախարար Սերգեյ Լավրովը։
«Մենք տեսանք, թե ինչպես ԵՄ-ն, Ֆրանսիան, Գերմանիան, ԱՄՆ-ը, հենց որ հասկացան, որ ռուս-հայ-ադրբեջանական գործընթացն արդյունք է տալիս երթուղիների ապաշրջափակման, սահմանի սահմանազատման և խաղաղության պայմանագրի պատրաստման հարցում, անմիջապես սկսեցին ներթափանցել»,- ամփոփիչ ասուլիսում նշեց նա։
Լավրովը հավելեց, որ Արևմուտքը չի ցանկանում թույլ տալ, որ «Երևանի և Բաքվի միջև Ռուսաստանի միջնորդությամբ կնքված համաձայնագրերը կայանան»։
«Ցավալի է, որ արևմտյան էգոիստական նկրտումների շահերը խանգարում են՝ ինչպես Հայաստանի, այնպես էլ՝ Ադրբեջանի հիմնարար շահերի իրականացմանը»,- եզրափակեց ՌԴ ԱԳՆ ղեկավարը։
