Մեզ ՆԱՏՕ չեն հրավիրում, մասնակի անդամակցության մասին ազդանշաններն անհեթեթություն են. Զելենսկի
Ուկրաինայի նախագահ Վլադիմիր Զելենսկին բացեիբաց հայտարարել է, որ Ուկրաինային դեռևս ՆԱՏՕ չեն հրավիրում, հայտնում է UNIAN-ը։
«Մենք գիտենք, որ սա (ՆԱՏՕ-ն) մեզ համար ամենահզոր տարբերակն է հիմա։ Մեզ ՆԱՏՕ չեն հրավիրում, իսկ ինչ-որ մասնակի մասնակցության մասին ազդանշանները, անկեղծ ասած, անհեթեթություն են»,- դեկտեմբերի 19-ին կայացած ամփոփիչ ասուլիսի ժամանակ ասել է Ուկրաինայի նախագահը։
Զելենսկին նշել է, որ այժմ որոշակի հաղորդագրություններ կան ՆԱՏՕ-ին մասնակի անդամակցության մասին։ Այնուամենայնիվ, Ուկրաինան երբեք հստակ առաջարկներ չի ստացել այս հարցում, և երկրի նախագահը դժվարությամբ է պատկերացնում նման առաջարկներից որևէ մեկի իրականացումը։
Զելենսկին նշել է, որ ՌԴ նախագահ Վլադիմիր Պուտինը հստակ ազդանշաններ է տալիս, որ խաղաղություն չի ցանկանում։ Ուստի, եթե Ուկրաինան անդամակցի ՆԱՏՕ-ին, Ռուսաստանի Դաշնության և Դաշինքի զորքերի միջև ուղիղ բախման հսկայական վտանգ կա, ասել է նա։
«Արդյո՞ք ՆԱՏՕ-ի երկրները կպայքարեն Ուկրաինայի մի մասի համար, որն այս կամ այն կարգավիճակն ունի ՆԱՏՕ-ում: Չէ՞ որ մենք չենք ճանաչում ռուսների կողմից օկուպացված տարածքները։ Այսինքն՝ սա ցույց կտա, որ մենք այնքան էլ ՆԱՏՕ-ում չենք»,- պարզաբանեց նա։
Նա «ֆանտազիա» է անվանել «Ուկրաինայի՝ ՆԱՏՕ մասնակիորեն մտնելու տարբերակները, քանի դեռ դրա մի մասն օկուպացված է»։
Ուկրաինան ՆԱՏՕ-ին անդամակցելու հայտ է ներկայացրել դեռ 2022 թվականի սեպտեմբերին։ Դաշինքի գլխավոր քարտուղար Յենս Ստոլտենբերգը հայտարարել է, որ երկիրը կարող է միանալ դաշինքին, եթե պատերազմից հետո իրականացնի բոլոր անհրաժեշտ բարեփոխումները։
