Անվտանգային խնդիրներ կան ու ակնհայտ են Սյունիքում, Տավուշում, Արարատում, Գեղարքունիքում, Վայոց ձորի մարզում. Փաշինյան
Հայաստանի ամենամեծ պրոբլեմներից մեկը բլոկադան է, որը շարունակվում է արդեն 30 տարի: Այս մասին ասել է Նիկոլ Փաշինյանը՝ հույս հայտնելով, որ խաղաղությամբ և «Խաղաղության խաչմերուկով» կհաղթահարեն այն։
Փաշինյանը նշեց` մտահոգված է այն հանգամանքով, որ որոշ միջազգային գործընկերներ իրենց քաղաքացիներին խորհուրդ չեն տալիս այցելել ՀՀ հարավային հատված։
«ՀՀ կառավարությունը բազմամիլիարդ ներդրումներ է անում ամբողջ երկրում, մասնավորապես Սյունիքում։ Վերջին 5 տարում մենք 100 մլրդ դրամից ավելի ներդրումներ ենք արել այնտեղ»,- ասաց նա։
«Մենք ի՞նչ ենք կարծում, Մեղրիով պե՞տք է անցնի երկաթուղի, որը կկապի Արևելքը-Արևմուտքին, այդ թվում՝ Ադրբեջանը Նախիջևանին, Թուրքիային, այդ թվում՝ Մեղրին Երասխին և Հայաստանի մնացած մասին, այդ թվում՝ Հայաստանը միջազգային երկաթուղային ցանցին, այո՛, միանշանակ, և դա 100 տոկոս համապատասխանում է մեր երկրի շահերին», – ասաց Փաշինյանը։
Ընդգծելով, որ կոմունիկացիաները պետք է բացվեն երկրների ինքնիշխանության իրավազորության ներքո՝ հավասարության և փոխադարձության սկզբունքներով՝ նա նշեց, որ Ադրբեջանը կարող է օգտվել մեր երկաթուղուց Նախիջանի կապի համար, այն նույն սկզբունքով, որ Հայաստանը կարող է օգտվել, օրինակ, Մեղրիի և Երասխի երկաթուղային կապի համար։
Փաշինյանը նշեց, որ ուզում են բացել նաև Արևելքն Արևմուտքին միացնող ավտոճանապարհները։ Նա նաև նշեց, որ 100 տոկոսանոց անվտանգություն կարող է ապահովել միայն խաղաղությունը, և սա է պատճառը որ մենք որդեգրում ենք խաղաղության օրակարգը:
