Instagram-ն արգելափակել է Ռամզան Կադիրովի որդիների օգտահաշիվները
Instagram-ն արգելափակել է Չեչնիայի ղեկավար Ռամզան Կադիրովի որդիների և մեծ թվով բաժանորդներով մի քանի այլ էջեր։ Այս մասին հայտարարել է Չեչնիայի ազգային քաղաքականության, արտաքին կապերի, մամուլի և տեղեկատվության նախարար Ահմեդ Դուդաևը, գրում է «Մոսկովսկի կոմսոմոլեցը»։
«Նախորդ օրը արգելափակվել են մեր հանրապետության առաջատար օգտահաշիվները տարբեր ինտերնետային հարթակներում»,- գրել է նա։
Նրա խոսքով, արգելափակվել են Կադիրովի որդիների՝ Ահմատի, Էլիի, Ադամի և Համզաթի հաշիվները, ինչպես նաև էջերը, որոնք պատմում են անձամբ Ռամզան Կադիրովի և նրա հոր՝ Չեչնիայի առաջին նախագահ Ահմատ Կադիրովի գործունեության մասին։ Բացի այդ, YouTube-ն արգելափակել է Չեչնիայի Գրոզնիի պետական հեռուստառադիոընկերության երեք ալիք։
Դուդաևն ասել է, որ արգելափակումը կապված է «տեղեկատվական դաշտում ճշմարտության ձայնը լռեցնելու» Արևմուտքի ցանկության հետ։ Դուդաևը հավելել է, որ Չեչնիան կփորձի վիճարկել այդ որոշումը, սակայն արգելափակումը «թույլ չի տա թաքցնել իրական ճշմարտությունը»։
