Դոդոնը բողոքի ցույցերն անվանել է իշխանությունների դեմ պայքարի լավագույն գործիք
Մոլդովայի ընդդիմադիր սոցիալիստների կուսակցության առաջնորդ, նախկին նախագահ Իգոր Դոդոնը կարծում է, որ խոշոր ազգային բողոքի ցույցերը լավագույն գործիքն են Մոլդովայի իշխանությունների դեմ պայքարում։ Այդ մասին տեղեկացնում է «ՌԻԱ Նովոստի»-ն։
Անցյալ շաբաթ ընդդիմադիր տարբեր կուսակցություններ Մոլդովայում միավորման կոչեր արեցին։ Նախկին վարչապետ, Մոլդովայի «Զարգացում և միավորում» կուսակցության առաջնորդ Իոն Չիկուն բոլորին հրավիրել է մասնակցել կայանալիք հանդիպմանը՝ «երկիրը ապաշնորհ կառավարությունից ազատագրելու գործընթաց սկսելու համար», սակայն որոշվել է փոխել ամսաթիվը՝ պայմանավորված ՏԻՄ ընտրություններով։
«Մենք կարծում ենք, որ պետք է բոլորի հետ միավորվենք ընդդեմ նախագահ Մայա Սանդուի։ Հանրահավաք կլինի, թե ոչ, մենք կորոշենք: Կուսակցության մեր ներկայացուցիչները երկխոսություն են սկսել այլ կուսակցությունների հետ: Առաջին շփումները եղել են, կարծում եմ, որ երկրորդ փուլից հետո այս աշխատանքը կշարունակվի։ Իշխանությունների դեմ պայքարը, կարծում եմ, մեզ բոլորիս կմիավորի, և մենք կկիրառենք տարբեր մեթոդներ: Կարծում եմ, որ ամենաարդյունավետ գործիքն ընդհանուր խոշոր ազգային բողոքի ցույցերն են»,- ասել է Դոդոնը ճեպազրույցում։
Անցյալ աշնանը Մոլդովայում ստեղծվել է ընդդիմադիր «Հանրային օրակարգ» պլատֆորմը՝ իշխանության տապալմանը հասնելու համար։ Այն ներառում էր ութ քաղաքական կազմավորում, սակայն նրանք զանգվածային միջոցառումներ չեն անցկացրել։ Գարնանը «Շոր» կուսակցությունը վերսկսեց բողոքի ակցիաները՝ կոչ անելով մյուս քաղաքական ուժերին միանալ քաղաքացիների իրավունքների պաշտպանությանը։ Հոկտեմբերին Սոցիալիստական կուսակցության նախկին նախագահ և առաջնորդ Իգոր Դոդոնը նաև կոչ արեց ընդդիմադիր կուսակցություններին միավորվել՝ պայքարելու իշխանությունների «բռնապետության և գրաքննության» դեմ։
