Բայդենը Նեթանյահուի հետ քննարկել է պաղեստինա-իսրայելական հակամարտության շուրջ ստեղծված իրադրությունը
ԱՄՆ նախագահ Ջո Բայդենն Իսրայելի վարչապետ Բենիամին Նեթանյահուի հետ հեռախոսազրույցում քննարկել է պաղեստինա-իսրայելական հակամարտության շուրջ ստեղծված իրադրությունը։ Այդ մասին հաղորդել է Սպիտակ տունը` ամփոփելով բանակցությունների արդյունքները։
«Նախագահ Բայդենը հեռախոսազրույց է ունեցել Իսրայելի վարչապետ Բենիամին Նեթանյահուի հետ, որի ընթացքում քննարկվել են իրադարձություններն Իսրայելում և Գազայի հատվածում»,- նշել են Սպիտակ տանը։
Տարածված հաղորդագրության մեջ նշված է, որ Բայդենը ողջունել է մարդասիրական օգնության երկու շարասյուների ուղարկումը, որոնք հատել են Գազայի հետ սահմանը, պարենը բաշխվում է կարիքավոր պաղեստինցիներին։ «Ղեկավարները հաստատել են, որ այս կարևոր օգնության առաքումը Գազա կշարունակվի», – հավելել են Սպիտակ տանը:
Նշվում է, որ Բայդենը երախտագիտություն է հայտնել Իսրայելին երկու ամերիկացի պատանդների ազատ արձակման հարցում ցուցաբերած աջակցության համար: Ղեկավարները քննարկել են ՀԱՄԱՍ-ի կողմից գերեվարված պատանդներին, այդ թվում՝ ԱՄՆ քաղաքացիներին ազատելու շարունակական ջանքերը։
Բայդենն ու Նեթանյահուն պայմանավորվել են պահպանել սերտ շփումները։
