Առաջիկայում Ադրբեջանում ՄԱԿ-ի մշտական համակարգողի գրասենյակի ներկայացուցիչները կրկին կայցելեն Լեռնային Ղարաբաղ. Ալիև
Ադրբեջանի նախագահ Իլհամ Ալիևը ԱՀԿ-ի Եվրոպայի տարածաշրջանային տնօրեն Հանս Հենրի Կլուգեի հետ Բաքվում կայացած հանդիպման ժամանակ հայտարարել է, թե իբր «այսպես կոչված, ռեժիմն է խուճապ առաջացրել Ղարաբաղի տեղի բնակչության շրջանում և ստիպել նրանց տեղափոխվել Հայաստան»։
Պաշտոնական հաղորդագրության համաձայն՝ զրուցակիցները խոսել են նաև Լեռնային Ղարաբաղում տիրող իրավիճակի մասին։
Ալիևի խոսքերով՝ «ներկայումս Ադրբեջանի բժշկական անձնակազմը ծառայություններ է մատուցում Խանքենդիի տեղի բնակչությանը», «առօրյա կարիքները հոգալու և սնունդ տրամադրելու համար տեղում ծառայություններ են մատուցում համապատասխան հաստատությունները»։
Նա հայտարարել է, որ կարևոր ենթակառուցվածքային օբյեկտները, ինչպես նաև պատմական, կրոնական և մշակութային հուշարձանները պահպանվում են ոստիկանության կողմից, իրականացվում է էլեկտրամատակարարում։
Ալիևն ընդգծել է, որ այս ամենը Ղարաբաղի հայ բնակիչների վերաինտեգրման ծրագրի պատրաստակամության և իրականացման ցուցիչ է։
Ալիևը նաև հայտարարել է, որ առաջիկայում Ադրբեջանում ՄԱԿ-ի մշտական համակարգողի գրասենյակի ներկայացուցիչները կրկին կայցելեն Լեռնային Ղարաբաղ։ Թե ինչ առաքելությամբ՝ ո՛չ Ալիևը, ո՛չ միջազգային կառույցը չեն հստակեցրել։
