«Ի հեճուկս Ադրբեջանի փորձերի՝ միջազգային հանրության հետ ակտիվ կոմունիկացիան այս թեմաների վերաբերյալ պետք է շարունակվի». Նիկոլ Փաշինյան
Այսօր կառավարության հերթական նիստի մեկնարկին Նիկոլ Փաշինյանը հայտարարեց, որ այսօր ժամը 06։00-ի սահմաններում ադրբեջանական զինված ուժերի ստորաբաժանումները հրետանային զենքերից ինտենսիվ կրակ են բացել Գեղարքունիքի մարզի Սոթք բնակավայրի ուղղությամբ տեղակայված հայկական դիրքերի վրա՝ հարվածներ հասցնելով ՀՀ ինքնիշխան տարածքին։
«Ակտիվ հրետակոծության ինտենսիվությունը որոշակիորեն նվազել է Հայաստանի բանակի ադեկվատ և արդյունավետ պատասխան գործողությունների արդյունքում։ Ադրբեջանի այս գործողությունները սադրիչ են և այլոց շարքում նպատակ ունեն զրոյացնել այն առաջընթացը, որը գրանցվել է մայիսի 1-4-ը Վաշինգտոնում տեղի ունեցած բանակցությունների ընթացքում։ Այսօրվա սադրանքը նպատակ ունի նաև խաթարել կիրակի օրը Բրյուսելում՝ եռակողմ ֆորմատով, իսկ հունիսի 1-ին Քիշնևում՝ հնգակողմ ֆորմատով նախատեսված բանակցությունները։ Փորձը ցույց է տալիս, որ բանակցություններն ադրբեջանական կողմին հարկավոր են միայն էսկալացիայի և պատերազմի պատճառաբանություն ստանալու համար, իսկ էսկալացիաներն օգտագործվում են բացառապես բանակցություններում գրանցված որևէ առաջընթաց զրոյացնելու համար»,- նշել է Նիկոլ Փաշինյանը։
Ըստ նրա, Ադրբեջանի պաշտպանության նախարարության երեկվա հաղորդագրությունները՝ հայկական բանակի կողմից հրադադարի ռեժիմի խախտման մասին, մտացածին են։ Նման տեղեկատվությունը հորինվում է իրադրությունը սրելու համար։
«Եթե իրադրություն սրելն Ադրբեջանի նախատրամադրվածությունը չէ, ապա որևէ տեղային միջադեպ կարելի է արագ կարգավորել, գոյություն ունեցող կապերով տեղեկատվություն ճշտելու, փոխանակելու և կանխարգելիչ պայմանավորվածություններ ձեռք բերելու միջոցով։ Նախորդ օրը նման բան տեղի չի ունեցել մեկ պարզ պատճառով, որևէ միջադեպ չի գրանցվել, և ադրբեջանական դիզինֆորմացիոն մեքենան հետին թվով այդ լուրը հորինել է իրադրությունը սրելու համար։ Իսկ իրադրության սրումը, կրկնում եմ՝ բանակցային գործընթացը զրոյացնելն է և հետագա բանակցությունների ընթացքը խաթարելը։ Սա միակ նպատակը չէ, հաջորդը՝ միջազգային և հայ հանրության ուշադրությունը Լաչինի միջացքում ապօրինի անցակետ տեղադրելու փաստից շեղելն է, նոր տեղում, նոր ճգնաժամ ստեղծելու միջոցով մոռացության տալով հինը»,- հավելեց Ն. Փաշինյանը։
Այս համատեքստում Նիկոլ Փաշինյանն ընդգծեց.
«Ի հեճուկս Ադրբեջանի փորձերի՝ այս բոլոր հարցերը շարունակում են մնալ մեր առաջնային օրակարգում։ Միջազգային հանրության հետ ակտիվ կոմունիկացիան այս թեմաների վերաբերյալ պետք է շարունակվի»։
Մանրամասները՝ 168.am-ի տեսանյութում
