«Էրդողանն oգտագործել է իր վերջին հաղթաթուղթը». Հույն վերլուծաբան

Հույն ակադեմիկոս և վերլուծաբան Կոնստանտինոս Ֆիլիսը հունական «Ekathimerini» թերթում հրապարակած իր հոդվածում անդրադարձել է Թուրքիայում տեղի ունեցող իրադարձություններին, հատկապես գալիք ընտրություններին։ Այս մասին տեղեկացնում է ermenihaber.am-ը։

Նա գրել է, որ նախագահ Ռեջեփ Թայիփ Էրդողանը մայիսի 14-ին կայանալիք նախագահական և խորհրդարանական ընտրություններից առաջ «oգտագործել է իր վերջին հաղթաթուղթը»։

Նշելով, որ Քահրամանմարաշում տեղի ունեցած երկրաշարժները «Էրդողանին անհանգստացնելու աստիճան փոխեցին Թուրքիայի քաղաքական պատկերը»՝ Կոնստանտինոս Ֆիլիսը գրել է, որ Էրդողանը ներկայացնում է ինքն իրեն որպես «կայուն և պատասխանատու տարբերակ» Թուրքիայում և աշխարհում՝ ի հակադրություն ընդդիմադիր «Ազգ» դաշինքի նախագահի թեկնածու Քեմալ Քըլըչդարօղլուի։

Կոնստանտինոս Ֆիլիսը, հիշեցնելով, որ Քեմալ Քըլըչդարօղլուն ներկայացնում է տարբեր կուսակցությունների դաշինք, և ընդգծելով, որ դաշինքում ճեղքեր կային մինչև նրա թեկնածության առաջադրումը, նշում է, որ նոր կառավարությունը հավանաբար խորհրդարանում չի ունենա բավարար մեծամասնություն՝ Սահմանադրությունը փոփոխելու համար։

Ֆիլիսը, անդրադառնալով ԱՄՆ-ի նկատմամբ Էրդողանի վարած քաղաքականությանը, պաշտպանության, ավտոմոբիլային արդյունաբերության և էներգետիկայի ոլորտում նրա ունեցած նախագծերին ու նպատակներին, գրում է, որ հինգ չափանիշներ կան, որոնք կարևոր դեր կխաղան ընտրություններում, դրանք են՝

1. «Արդարություն և զարգացում» կուսակցության (ԱԶԿ) դաշինքը «Ազատ գործ» կուսակցության (Hüda-Par) և «Նոր բարօրություն» կուսակցության (Yeniden Refah Partisi) հետ,

2. Էրդողանի և Դևլեթ Բահչելիի, ի տարբերություն ընդդիմության, միասնական ցուցակով հանդես չգալը,

3. քուրդ ընտրողները,

4. Մուհարեմ Ինջեի նախագահի թեկնածություն դնելը,

5. երիտասարդ ընտրողները։