Վաղը կարևոր օր է Կարեն Անդրեասյանի համար, իսկ Աննա Վարդապետյանը հերթական անգամ հասավ իր նպատակին
Բարձրագույն դատական խորհրդի (ԲԴԽ) նախագահ Կարեն Անդրեասյանի համար վաղը կարևոր օր է։
168.am–ի տեղեկություններով` նա Խորհրդի շենքում հանդիպելու է Երևան քաղաքի ընդհանուր իրավասության դատարանի` քրեական գործեր քննող դատաավորների հետ։
Ըստ էության իր պաշտոնավարման բուռն սկզբից հետո սա Կարեն Անդրեասյանի համար իր լիազորություններից բխող առաջին հանդիպումը պետք է լինի։
Երկրում ակնկալվում են ոչ պակաս բուռն իրադարձություններ, քաղաքական գործընթացներ ու հուզումներ, և դրանց է պատրաստվում իրավապահ համակարգը։ Իսկ դատական իշխանությունն այս օղակում կարևորագույն գործառույթ ունի։
Նման հանդիպումները նորություն չեն ԲԴԽ ղեկավարության համար։ Գագիկ Ջհանգիրյանը ևս կազմակերպում էր դատավորների հետ քննարկումներ, տարատեսակ խոստումներ տալիս նրանց` այդպիսով դարձնելով կառավարելի։ Միայն թե Ջհանգիրյանն ինքն էր գնում դատարաններ, իսկ Կարեն Անդրեասյանը խուսափում է ավելորդ անգամ շենքից դուրս գալ։
Իսկ եթե իրականություն դառնա այսօր մամուլում տեղ գտած տեղեկությունը, թե Քննչական կոմիտեի նախկին նախագահ Հայկ Գրիգորյանը հետ է վերցրել զինդատախազ դառնալու հայտը և գործուղվում է ԲԴԽ՝ Գրիգոր Բեքմեզյանի հրաժարականից հետո իրավաբան-գիտնականի թափուր հաստիքը համալրելու համար, ապա պետք է արձանագրել գլխավոր դատախազ Աննա Վարդապետյանի հերթական հաղթանակը։
168.am-ն ավելի վաղ գրել էր, որ նա ամեն կերպ ընդդիմացել է Հայկ Գրիգորյանի նշանակմանը, սակայն, քանի որ վերջինիս անգործ չթողնելու քաղաքական որոշում է եղել, չի կարողացել հասնել իր նպատակին։
Գրիգոր Բեքմեզյանի հրաժարականն ամեն ինչ իր տեղը դրեց. և՛ գայլերն են կուշտ, և՛ ոչխարներն են գոհ։
