Գիշերային մղձավանջները լուրջ հիվանդության նշան են. գիտնականներ

Գիտնականները պարզել են, որ մղձավանջները, որոնք ստիպում են մարդուն արթնանալ գիշերվա կեսին, ոչ միայն տհաճ փորձառություն են, այլ նաև ապագայում լուրջ հիվանդության զարգացման հնարավոր նշան կարող են լինել, ըստ shantnews-ի՝ փոխանցում է Вести պարբերականը։

Բիրմինգհեմի համալսարանի գիտնականները ենթադրում են, որ մտածողության և հիշողության հետ կապված խնդիրների (ինչն, ակնհայտորեն, վկայում է դեմենցիայի սկզբի մասին) առաջացումից մի քանի տարի և նույնիսկ մի քանի տասնամյակ առաջ մարդը կարող է սկսել մղձավանջներ ունենալ: Սա կարևոր դիտարկում է, քանի որ հայտնի են դեմենցիայի զարգացման ռիսկի շատ քիչ ցուցանիշներ, որոնք կարելի է հայտնաբերել արդեն միջին տարիքում։

Գիտնականները կարծում են, որ վատ երազները կարող են օգտակար լինել դեմենցիայի զարգացման բարձր ռիսկի գոտում գտնվող անհատներին հայտնաբերելու համար: Դա կօգնի հնարավորինս շուտ սկսել կանխարգելումը, ինչը կդանդաղեցնի հիվանդության զարգացումը։ Միևնույն ժամանակ հետազոտողները խոստովանում են, որ այս կապը հաստատելու համար ավելի շատ աշխատանք կպահանջվի:

Աշխատանքի հեղինակներն ուսումնասիրել են ԱՄՆ-ի բնակչության երեք խմբերի տվյալներ։ Նրանց թվում են եղել 35-64 տարեկան ավելի քան 600 չափահաս տղամարդիկ և կանայք և 79 և ավելի տարեկան 2600 մեծահասակներ:
Ոչ մի մասնակից հետազոտության սկզբում դեմենցիա չի ունեցել: Երիտասարդ խմբի կամավորներին հետևել են միջինը 9 տարի, իսկ տարեց մասնակիցներին՝ 5 տարի:

Հետազոտությունը սկսել է տվյալներ հավաքել 2002-2012 թվականներին: Մասնակիցները լրացրել են մի շարք հարցաթերթիկներ, ներառյալ Պիտսբուրգի քնի որակի ինդեքսը, որը ներառում է հարց, թե որքան հաճախ են մարդիկ վատ երազներ տեսնում: Հեղինակները վերլուծել են այս տվյալները՝ օգտագործելով վիճակագրական ծրագրակազմ՝ պարզելու, թե արդյոք ավելի հաճախ մղձավանջներ ունեցող մասնակիցներն ավելի հակված են ճանաչողական ֆունկցիաների նվազման և տկարամտության ախտորոշման ավելի մեծ տարիքում:

Հետազոտությունը ցույց է տվել, որ միջին տարիքի մարդկանց մոտ (35-64 տարեկան), ովքեր ամեն շաբաթ վատ երազներ են տեսնում, հաջորդ տասնամյակի ընթացքում 4 անգամ ավելի հաճախ է ճանաչողական ֆունկցիաների անկում ախտորոշվել: Միևնույն ժամանակ, տարեց մարդկանց մոտ, ովքեր ավելի հաճախ են մղձավանջներ տեսել, երկու անգամ ավելի հաճախ են դեմենցիա ախտորոշել:

Հետագայում հետազոտողները նախատեսում են ուսումնասիրել, թե արդյոք ավելի երիտասարդների մոտ մղձավանջները կարող են կապված լինել դեմենցիայի ապագա ռիսկի հետ: Բացի այդ, աշխատանքի հեղինակները ակնկալում են ուսումնասիրել վատ երազների կենսաբանական հիմքերը ինչպես առողջ, այնպես էլ դեմենցիա ունեցող մարդկանց մոտ՝ օգտագործելով էլեկտրաէնցեֆալոգրաֆիա և մագնիսառեզոնանսային տոմոգրաֆիա:

Մեծ Բրիտանիայի հետազոտողների նոր աշխատանքը հրապարակվել է eClinicalMedicine ամսագրում։