Այժմ Չինաստանում յուրաքանչյուր անձ պարտավոր է թեստավորվել երկու օրը գոնե մեկ անգամ
Չինաստանի՝ «զրոյական համբերատարություն» հակաքովիդյան պայքարն արդարացրել է իրեն, քանի որ երկրի իշխանությունների համար առաջնայինը մարդկային կյանքերն են, մարդու առողջությունը: միջազգային մեդիա հաղորդակցության կենտրոնի կազմակերպած ծրագրին մասնակցող լրագրողների համար հատուկ դասախոսության ընթացքում նման կարծիք հայտնեց քաղաքական գիտությունների թեկնածու, Պեկինի Օտար լեզուների ինստիտուտի ավագ մասնագետ Սյուն Լեպինը:
«Քովիդի դեմ պայքարի «զրոյական համբերատարություն» քաղաքականությունն արդյունավետ ստացվեց, որն արձանագրում ենք հիմա: Բազմաթիվ անգամներ Չինաստանի առաջնորդ Սին Ծինպինն ասել է, որ Չինաստանի համար կարևոր են մարդկային կյանքերը, մարդու առողջությունը»,-ասաց Լեպինը:
Նրա խոսքով` համաճարակի դեմ պայքարում մի քանի առանձնահատկություններ ևս կան, քանի որ այս ընթացքում ճիշտ քաղաքականության արդյունքում Չինաստանը հասել է նրան, որ Քովիդի դեմ պայքարի ավարտը սարերի հետևում չէ:
Չինաստանը համաճարակի դեմ պայքարում հսկայական, անգնահատելի փորձ է ձեռք բերել: Չինական մի շարք քաղաքներ մեծածավալ աշխատանքի արդյունքում հասել են նրան, որ այժմ դրական թեստերի քանակը շատ ցածր մակարդակի վրա է:
«Մարդկային կյանքեր փրկել հաջողվեց նաև փոխկապակցված վարակակիրներին արագ մեկուսացնելու շնորհիվ: Գուցե, համավարակի սկզբնական շրջանում այդ ամենը դրական արձագանք չէր ստանում, սակայն այժմ, հետ նայելով, կարող ենք ասել, որ այս քաղաքականությունն արդարացվեց»,-ասաց նա:
Լեպինը ներկայացրեց նաև համավարակին դիմակայելու իր պատմությունը. նա ծնունդով Ուհան քաղաքից է և համաճարակի բռնկման ժամանակ հենց այդ քաղաքում է եղել:
Այժմ Չինաստանում յուրաքանչյուր անձ պարտավոր է թեստավորվել երկու օրը գոնե մեկ անգամ: Լինում են դեպքեր, երբ քաղաքացիները թեստավորվում են ամեն օր:
