Դատավոր Արտուշ Գաբրիելյանը պատժվեց
Քիչ առաջ Բարձրագույն դատական խորհուրդը (ԲԴԽ) հրապարակեց Երևան քաղաքի առաջին ատյանի ընդհանուր իրավասության դատարանի դատավոր Արտուշ Գաբրիելյանին կարգապահական պատասխանատվության ենթարկելու հարցի վերաբերյալ որոշումը:
Խորհուրդը որոշեց Արդարադատության նախարարության ներկայացրած միջնորդությունը բավարարել:
Դատավոր Արտուշ Գաբրիելյանին հայտարարվեց նախազգուշացում:
Հիշեցնենք՝ Դատավորի նկատմամբ կարգապահական վարույթը նախարարը հարուցել է ՀՀ գլխավոր դատախազի տեղակալ Գևորգ Բաղդասարյանի հաղորդման հիման վրա։
Արտուշ Գաբրիելյանի նկատմամբ կարգապահական վարույթ հարուցելու հիմքը ՀՀ Քրեական օրենսգրքի 34-117 հոդվածի 2-րդ մասով մեղադրվող ամբաստանյալի նկատմամբ կալանավորումը որպես խափանման միջոց չկիրառելն է: Խոսքը գողության փորձ հանցակազմի մասին է:
Գլխավոր դատախազի տեղակալ Գևորգ Բաղդասարյանը դատավարական խախտում է դիտարկել Արտուշ Գաբրիելյանի այս որոշումը, քանի որ, ըստ նրա՝ վերջինս ղեկավարվել է 34-177 հոդվածի նախկին խմբագրությամբ և հաշվի չի առել փոփոխությունը:
Կարգապահական վարույթի քննությունը սկսվել և ավարտվել էր մեկ նիստի շրջանակներում: Արտուշ Գաբրելյանը հրաժարվել էր որևէ մեկի հարցերին պատասխանել՝ նշելով, որ Արդարադատության նախարարություն է ուղարկել պարզաբանում:
«Հետևաբար՝ այս պահին ես ավելացնելու բան չունեմ, միջնորդության վերաբերյալ որևէ դիրքորոշում էլ չեմ ցանկանում հայտնել և, ընդհանրապես, օգտվելով իմ իրավունքից, հրաժարվում եմ ընդհանրապես բոլոր հարցերին պատասխանելուց»,- ասել էր նա:
