ՊՇՌ թեստի բացասական արդյունք կամ պատվաստման հավաստագիր պահանջելու որոշման հետևանքով հանրային սննդի օբյեկտներ և մշակութային կենտրոններ այցելողների թիվը նվազել է
Առողջապահության նախարարի հրամանով՝ հունվարի 22-ից Հայաստանում հանրային սննդի կետեր, հյուրանոցներ, մարզասրահներ, գրադարաններ, թանգարաններ և մշակութային այլ վայրեր քաղաքացիների մուտքը թույլատրվում էր միայն ՊՇՌ թեստի բացասական արդյունքով կամ պատվաստման հավաստագրով։ Տնտեսվարողները պետք է ստուգեին՝ արդյոք քաղաքացին ունի՞ համապատասխան փաստաթղթերը, թե՞ ոչ, իսկ տնտեսվարողներին արդեն տեսչական մարմինները պետք է վերահսկեն։ Եթե տնտեսվարողը չպահպաներ կանոնները, ապա առաջին անգամ տուգանվելու էր 100-300 հազար դրամով, կրկնվելու դեպքում՝ մինչև 500.000 դրամով։
«Ռեստորանների ասոցիացիա» ՀԿ-ի նախագահ Աշոտ Բարսեղյանի փոխանցմամբ՝ որոշումը բացասաբար է ազդել հանրային սննդի օբյեկտների գործունեության վրա:
«Շատ վտանգավոր բան է անում Առողջապահության նախարարությունը: Պարզ չեն օրենքի կիրառման հիմքերը, ձևերը, ու մարդկանց տուգանում են՝ կարանտինի նորմերի խախտման հիմքով: Ով որ տուգանվել է՝ բողոքարկելու է: Պետք է սա կիրառեին հասարակական տրանսպորտում, որովհետև անձը տրանսպորտ նստելով՝ հասնում է ռեստորան: Սակայն այնտեղ եթե չեն կիրառում, այլ տեղերում կիրառելու իմաստը ո՞րն է: Որոշումը մեծ հարված էր հասցրել՝ մոտ 50 տոկոսով նվազել է շրջանառությունը: Հատկապես ձմեռային սեզոնը մեզ համար ահավոր էր»,- 168.am-ի հետ զրույցում ասաց «Ռեստորանների ասոցիացիա» ՀԿ-ի նախագահը:
Վնասը շարունակում են կրել նաև մշակութային կենտրոնները:
Երևանի մնջախաղի պետական թատրոնի տնօրեն Մանվել Խաչատրյանից հետաքրքրվեցինք՝ հսկել կարողանո՞ւմ են, և արդյո՞ք կա հանդիսատեսի թվի նվազում, մեր զրուցակիցը դրական պատասխան տվեց. «Այո, նվազել է, բայց հսկել փորձում ենք, քանի որ հանդիսատեսի քանակը քիչ է՝ վերահսկել ստացվում է»:
Հավելենք, որ պահանջը չի վերաբերում մինչև 18 տարեկաններին, հղիներին, փաստագրված բացարձակ հակացուցում ունեցողներին՝ բացարձակ հակացուցման մասին բժշկական փաստաթուղթ (առողջության առաջնային պահպանման բժշկի կողմից տրված Առողջապահության նախարարի 2021 թվականի դեկտեմբերի 6-ի թիվ 88-Ն հրամանի պահանջների համաձայն) ներկայացնելու դեպքում, նախկինում կորոնավիրուսային հիվանդությամբ (COVID-19) հիվանդացածներին՝ ՊՇՌ հետազոտության առաջին դրական արդյունքից հաշված 90 օրվա ընթացքում՝ կորոնավիրուսային հիվանդության (COVID-19) ախտորոշման ՊՇՌ հետազոտության առաջին դրական արդյունքը հավաստող Էլեկտրոնային առողջապահության միասնական տեղեկատվական ԱՐՄԵԴ համակարգից արտատպված սերտիֆիկատ ներկայացնելու դեպքում։
