Էրդողանը հանդիպումներ է ունեցել Մակրոնի և Մերկելի հետ
Հռոմում կայացած Մեծ քսանյակի (G20) գագաթնաժողովի շրջանակներում Թուրքիայի նախագահ Ռեջեփ Թայիփ Էրդողանը հանդիպումներ է ունեցել Ֆրանիսայի նախագահ Էմանուել Մակրոնի և Գերմանիայի կանցլեր Անգելա Մերկելի հետ։ Այս մասին տեղեկացնում է ermenihaber.am-ը։
Լիբիայի և Արևելյան Միջերկրականի խնդիրների շուրջ տարաձայնություններ ունեցող Թուրքիայի և Ֆրանսիայի առաջնորդների փակ հանդիպումը տևել է 50 րոպե։
30 րոպե ընթացած Էրդողան-Մերկել հանդիպմանը թուրքական կողմից ներկա են գտնվել նաև արտգործնախարար Մևլութ Չավուշօղլուն, ֆինանսների նախարար Լյութֆի Էլվանը և այլք, իսկ գերմանական կողմից՝ Օլաֆ Շոլցը, որի հետ Գերմանիայում բանակցություններ են տարվում կոալիցիոն կառավարություն ձևավորելու շուրջ։
Մինչ այդ Էրդողանը հանդիպել էր նաև Եվրոպական հանձնաժողովի նախագահ Ուրսուլա ֆոն դեր Լայենին և Իտալիայի վարչապետ Մարիո Դրագիին։
Ավելի ուշ Էրդողանը մամուլի ասուլիս է տվել՝ ամփոփելով հանդիպումների արդյունքները։
