Որոշ մարգինալ ուժեր, «Հայաստան» դաշինքին սեղմելով, տեղ են բացում իրենց համար. Աննա Գրիգորյան
Հոկտեմբերի 12-ին աշխատանքային այցով Մոսկվա մեկնած ՀՀ վարչապետ Նիկոլ Փաշինյանը հանդիպել է ՌԴ նախագահ Վլադիմիր Պուտինի հետ։
Կողմերը քննարկել են 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների կատարման ընթացքին, տարածաշրջանում կայունության ամրապնդման, տնտեսական կապերի վերականգնման հետագա քայլերին ու տեղի ունեցող զարգացումներին վերաբերող հարցեր։
Փաշինյան-Պուտին հանդիպումից առաջ Մոսկվայում հանդիպել են նաև Հայաստանի և Ռուսաստանի պաշտպանության նախարարներ Արշակ Կարապետյանն ու Սերգեյ Շոյգուն։
Մոսկվայում հոկտեմբերի 12-ին և 13-ին Կիրիլ Պատրիարքը հանդիպումներ է անցկացնելու Ամենայն Հայոց կաթողիկոսի և Կովկասի մահմեդականների վարչության նախագահ, շեյխ Ալլահշյուքար Փաշազադեի հետ:
Մոսկվա է ժամանել ԱՄՆ պետքարտուղարի տեղակալ Վիկտորիա Նուլանդը՝ տարածաշրջանային խնդիրներ քննարկելու համար։
168 TV-ի «Ռեվյու» հաղորդաշարի եթերում, անդրադառնալով մոսկովյան հանդիպումներին, ԱԺ «Հայաստան» խմբակցության պատգամավոր Աննա Գրիգորյանը նշեց, որ այս բանակցություններն իրենց հերթին ցույց են տալիս, որ մենք գործ ունենք Հարավային Կովկասում նոր վերաձևավորումների հետ, քանի որ պատերազմից հետո այս տարածաշրջանում փոխվել են ոչ միայն ուժերի հավասարակշռությունը, այլ նաև հիմնական դերակատարները։
«Դրանով է պայմանավորված, որ պատերազմից հետո ակտիվորեն խոսվում է 3+3 հարթակի մասին, որի հիմնական դերակատարները Թուրքիան և Ադրբեջանն են. պետություններ, որոնք ցանկանում են այս տարածաշրջանային նոր հարթակով փոխարինել Մինսկի խմբի համանախագահությանը, իսկ դա մեզ համար նպաստավոր չէ, որովհետև Արցախի հիմնախնդրի՝ մեզ համար ցանկալի լուծումը հնարավոր է գտնել միայն Մինսկի խմբի համանախագահության շրջանակներում։ Ակնհայտ է, որ բանակցությունների սեղանին է և՛ Սյունիքի հարցը, և՛ Արցախի կարգավիճակի հարցը»,- ասաց Աննա Գրիգորյանը։
Դիտարկմանը, երբ սեպտեմբերի 15-ին Կառավարության հետ հարցուպատասխանի ժամանակ իր հարցին՝ արդյոք բացառո՞ւմ է Արցախի որևէ կարգավիճակ Ադրբեջանի կազմում, Փաշինյանը հստակ պատասխան չտվեց, չբացառեց, արդյոք, դա չի՞ նշանակում, որ Ադրբեջանի կազմում Արցախի կարգավիճակը չի բացառելու նաև Մոսկվայում, Աննա Գրիգորյանը պատասխանեց.
«Նա, ըստ էության, ասաց, որ Արցախի կարգավիճակը կարող է լինել Ադրբեջանի կազմում. ավելին՝ ոչ միայն ասաց, այլ սկսեց ենթատեքստերով բացատրել, թե ինչո՞ւ կարող է նման բան լինել։ Հետևապես, այս իշխանությունների համար հակառակ հայկական պետական շահի է գործունեությունը, նրանց համար կարմիր գիծ չկա. օրինակ՝ այդպիսի կարմիր գիծ է մեզ համար այն, որ Արցախը չի կարող լինել Ադրբեջանի կազմում, հետևապես՝ վստահ եմ, որ Փաշինյանը Մոսկվայում այս կարմիր գիծն առաջ չի տանելու, որովհետև Նիկոլ Փաշինյանն ու իր իշխանությունը Ադրբեջանի համար նվեր են։ Տեսեք, թե ինչպե՞ս են Գորիս-Կապան ճանապարհը ոչ միայն տվել Ադրբեջանին, այլ այդ տալը բացատրող նպաստավոր հայտարարություններ են անում»,- ասաց Գրիգորյանը՝ նշելով՝ հենց նման հայտարարություններով Հայաստանի սուվերեն տարածքը թշնամուն հանձնելու համար էր, որ այս իշխանությունը պաշտոնից հեռացրեց Սյունիքի մի շարք համայնքապետերի։
«Բոլոր համայնքապետերի նկատմամբ ռեպրեսիաներն արդյունք էին նրա, որ նրանք պատերազմից հետո ասացին՝ մի րոպե, ինչպե՞ս եք հերթական զիջմանը գնում»,- ասաց Գրիգորյանը։
Դիտակմանը՝ ըստ ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանի՝ Առուշ Առուշանյանը Սյունիքի ինքնապաշտպանությանը չի էլ մասնակցել, Գրիգորյանն արձագանքեց.
«Զավեշտ է. երբ Առուշ Առուշանյանն իր մյուս գործընկերների հետ կազմակերպում էր Սյունիքի ինքնապաշտպանությունը, Արմեն Խաչատրյանը թուղթ ու գրիչը ձեռքը դիմում էր ԱԺ համապատասխան մարմնին՝ փող ստանալու և Սյունիք հասնելու համար»։
Անդրադառնալով խորհրդարանական ընդդիմության շուրջ ծավալվող քննադատությանը՝ Աննա Գրիգորյանը նշեց, որ խորհրդարանական ընդդիմությանը քննադատում են՝ մարտավարության փոփոխության անհրաժեշտության համար, և այս հարցով իրենք բաց են քննարկումների նոր օրակարգերի համար, սակայն, առողջ քննադատությունից զատ, կան նաև որոշ մարգինալ ուժեր, որոնք այլ նպատակ են հետապնդում։
«Ընդդիմության որոշ մարգինալ հատվածներ հիմա փորձում են կազմալուծել ձևավորված ընդդիմադիր միասնական ճակատը, բայց մենք չենք ընկնելու այդ ծուղակի մեջ, և մեր օրակարգը բաց է լինելու իրական ընդդիմադիր ուժերի մտքերի համար։ Մենք պատրաստ ենք դրանք առաջ տանել, թեև, կրկնում եմ, կան ուժեր, որոնք ուզում են «Հայաստան» դաշինքին սեղմել՝ իրենց համար տեղ բացելու համար, իսկ դա պառակտիչ գործողություն է»,- ասաց պատգամավորը։
Հարցազրույցի մանրամասները՝ տեսանյութում
