Ոստիկանները բերման են ենթարկել թմբուկահարին՝ թմբուկն էլ հետը. Լիլիթ Գալստյան
Այսօր հանրապետության ամբողջ տարածքում անհնազանդության ակցիաներ են տեղի ունենում: ՀՅԴ ԳՄ անդամ Լիլիթ Գալստյանը, որ Տիգրան Մեծ պողոտան փակելու ընթացքում այնտեղ էր, 168.am-ի հետ զրույցում ոստիկանների գործողությունները գնահատեց անհամաչափ:
«Ոստիկանները անհամաչափ բռնություն, ուժ կիրառեցին: Նույնիսկ, տեսնելով որ ճաղավանդակներ կան, ուղղակի հրեցին, մի քանի հոգու գետնին տապալեցին, թմբկահարին բերման ենթարկեցին, կարծեմ թմբուկն էլ՝ հետը, բայց մեր երիտասարդները, մեր ժողովուրդն անընկրկելի են: Պայքարը շարունակվելու է, որ Նիկոլը դավաճան է, և, որ Հայաստանը պետք է լինի առանց Նիկոլ, ապաքինելու մեր վերքերը, վերագտնելու արժանապատվությունը, կառուցելու արժանապատիվ երկիր, դա միանշանակ է»,- ասաց Գալստյանը:
Նա նաև պնդեց, որ Հայաստանում այլևս իշխանություն չկա:
«Թուրքերը GPS-ով Հայաստանի ողջ արևելյան սահմանում առաջ են ներխուժում: Նիկոլ, ունեցիր արժանապատվություն, հավաքիր քո բարոյականության վերջին փշուրները և հեռացիր»,- ասաց Գալստյանը և պնդեց, որ, բացի քաղաքականից, Նիկոլ Փաշինյանը նաև իրավական գնահատականի պետք է արժանանա:
Հիշեցնենք՝ ընդդիմադիր ուժերը դեկտեմբերի 5-ին հայտարարություն արեցին և մինչև այսօր ժամը 12:00-ն ժամանակ տվեցին վարչապետ Նիկոլ Փաշինյանին ինքնակամ հրաժարական տալու, ինչը, սակայն, տեղի չունեցավ:
