«Պետք է ավելի խիստ պատիժ նախատեսվի, որպեսզի անձինք ձեռնպահ մնան նման արարքներ կատարելուց». Գաբրիել Բալայան
Ազգային ժողովում այսօր հրավիրված արտահերթ նիստում առաջին ընթերցմամբ ընդունվեց Քրեական օրենսգրքում փոփոխությունների նախագիծն առաջին ընթերցմամբ ընդունելու մասին հարցը, որով առաջարկվում է ավելացնել ռազմական դրության, պատերազմի կամ մարտի պարագաներում դասալքության, հրաման չկատարելու, զորամասը կամ ծառայության վայրն ինքնակամ լքելու, զորամաս կամ հատուկ պահպանվող զինվորական այլ տարածք ապօրինի մուտք գործելու համար նախատեսված պատժաչափերը:
Նախագիծը ներկայացնելուց հետո հիմնական զեկուցող, Պաշտպանության նախարարի տեղակալ Գաբրիել Բալայանին հարց ուղղեց ԱԺ «Լուսավոր Հայաստան» կուսակցության պատգամավոր Տարոն Սիմոնյանը՝ խնդրելով ներկայացնել, թե ի՞նչ նպատակ ունի այս նախագիծը:
«Մենք՝ իրավաբաններս, բոլորս գիտենք, որ անձինք հանցագործություն չեն կատարում ավելի շատ ոչ թե՝ պատժի խստությունից ելնելով, այլ՝ պատժի անխուսափելիությունից ելնելով: Հիմա պատժի խստացումը ի՞նչ տրամաբանական կապ ունի հանցագործության դեմ պայքարի հետ: Թե՞ պարզապես դա այսպես ավելի հրապարակայնացնելու և դրա միջոցով անձանց հորդորելու, որ ձեռնպահ մնան հանցագործություն կատարելիս: Դա՞ է նպատակը: Ունե՞ք պրակտիկ փորձեր, որ անձինք կատարել են հանցագործություն՝ նաև իմանալով, որ փոքր է պատասխանատվությունը կամ քիչ է: Թե ո՞րն է, էլի, պատճառը, որ մենք գնում ենք խստացման ճանապարհով, իմա՞ստը»,- հարց ուղղեց Տարոն Սիմոնյանը:
«Իրականում երկուսն էլ, ասեմ Ձեզ: Այո, ունենք արդեն համապատասխան մեղադրանքներ առաջադրված, ունենք համապատասխան իրավախախտումներ իրականացված, այսինքն՝ օրենքով արգելված այդ արարքը կատարելու հետ կապված՝ համապատասխան պաշտոնատար անձանց մեղադրանքներ են առաջադրված: Եվ էս պահի դրությամբ, այո, գտնում ենք, որ դա պետք է ավելի հրապարակային, ավելի խիստ պատիժ նախատեսի, որպեսզի անձինք ձեռնպահ մնան նման արարքներ կատարելուց կամ անգործություն ցուցաբերելուց որոշակի իրադրության պարագայում»,- հարցին ի պատասխան՝ ասաց պաշտպանության նախարարի տեղակալ Գաբրիել Բալայանը:
