Երևանի Աբովյան և Արամի փողոցների խաչմերուկի մոտակայքում 3 ավտոմեքենա է բախվել
Հոկտեմբերի 25-ին՝ ժամը 03։35-ին, Ճգնաժամային կառավարման ազգային կենտրոն տեղեկություն է ստացվել, որ Երևան քաղաքի Աբովյան և Արամի փողոցների խաչմերուկի մոտակայքում տեղի է ունեցել ՃՏՊ, առկա է գազի արտահոսք․ կան տուժածներ:
Դեպքի վայր են մեկնել ԱԻՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը և Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։
Պարզվել է, որ բախվել են «BMW», «Toyota Land Cruiser» և «Hundai Elantra» մակնիշների ավտոմեքենաները, ինչի հետևանքով «Hundai Elantra» մակնիշի ավտոմեքենայի վարորդը ստացել է մարմնական վնասվածքներ:
Փրկարարները տուժածին մոտեցրել են շտապօգնությանը, հոսանքազրկել ավտոմեքենաները և փակել «Hundai Elantra» մակնիշի ավտոմեքենայի գազի բալոնի փականը:
