Փորձ է արվում սահմանային լարվածությունը տեղափոխել ՌԴ տարածք. ՌԴ–ում ՀՀ դեսպանություն

Ռուսաստանում Հայաստանի դեսպանությունը հանդես է եկել հայտարարությամբ, որում, մասնավորապես, ասված է.

«Վերջին օրերին մենք ադրբեջանցիների կողմից շարունակում ենք արձանագրել հայ-ադրբեջանական սահմանին տիրող իրավիճակով պայմանավորված լարվածությունը ՌԴ տարածք տեղափոխելու և երկու համայնքների միջև կոնֆլիկտ հրահրելու փորձեր:

Մասնավորապես, նման դրսևորումներ են նկատվում Մոսկվայի և ՌԴ այլ քաղաքների առևտրա-տնտեսական հարթակներում, որոնք այս կամ այն կերպ կապ ունեն ադրբեջանական իշխանությունների հետ:

Այս գիշեր տեղի ունեցած իրադարձությունները, որ ուղեկցվել են բազմաթիվ սադրանքներով, ինչպես նաև հայերի վրա հարձակումներով, ցավոք, հերթական անգամ հաստատում են, որ ադրբեջանական կողմի գործողություններում դիտավորություն կա: Այդ սադրանքների նպատակը Ռուսաստանում ազգամիջյան համաձայնության, համերաշխության խարխլումն է, բազմազգ հանրությունում լարվածություններ առաջացնելն ու երկրում կոնֆլիկտային իրավիճակների նախադեպեր ստեղծելը:

Այս գիշեր տեղի ունեցած դեպքերի, ինչպես նաև սադրելու այլ փորձերի մասին դեսպանությունը, Ռուսաստանի հայերի միությունը և այլ կառույցներ արդեն տեղեկացրել են ՌԴ համապատասխան մարմիններին:

Մենք կարծում ենք, որ պետք է անհապաղ քայլեր ձեռնարկվեն իրավիճակի կարգավորման ուղղությամբ՝ խուսափելու համար հետագա զարգացումներից: ՌԴ տարածքում գտնվող տնտեսվարող սուբյեկտները, անկախ ազգությունից ու քաղաքացիությունից, պետք է պահպանեն ՌԴ օրենքները:

Միևնույն ժամանակ, ելնելով ստեղծված իրավիճակից և հայ համայնքի ներկայացուցիչներին ամենատարբեր սադրիչ գործողությունների մեջ ներքաշելու փորձերից, խնդրում ենք մեր հայրենակիցներին՝ լինել զգոն, զուսպ, չտրվել սադրանքների, չմասնակցել ի պատասխան ադրբեջանական սադրանքների կազմակերպված ակցիաների կամ նախաձեռնությունների:

Մենք շարունակում ենք աշխատել ստեղծված խնդիրների լուծման ուղղությամբ՝ հավատարիմ մնալով ազգամիջյան համերաշխության պահպանման սկզբունքին:

Որևէ սադրիչ դրսևորում նկատելու դեպքում խնդրում ենք անհապաղ տեղեկացնել Դեսպանության, Ռուսաստանի հայերի միության և այլ կառույցների թեժ գիծ, ինչպես նաև դիմել իրավապահ մարմիններին»: