«Բանակի վերաբերյալ տարիներ շարունակ քաղհասարակության բարձրացրած խնդիրները մինչ օրս մնում են անարձագանք». Զարուհի Հովհաննիսյան

Իրավապաշտպան Զարուհի Հովհաննիսյանը 168TV-ի «Ռեվյու» հաղորդման ընթացքում ասաց, որ ինչպես նախկինում, այնպես էլ հիմա իրավապաշտպանները թիրախավորվել են պաշտոնյաների կողմից. «Անգամ եղել են իրավապաշտպաններ, որոնք ստացել են փաստաթուղթ, որտեղ կոնկրետ գրված էր՝ Ադրբեջանի ջրաղացին ջուր լցնող: Այդպիսի փաստաթղթեր են ստացել իրավապաշտպանները ՊՆ-ից: Երևույթը շարունակական է, թեպետ սպասվում էր, որ երկրում տեղի ունեցած փոփոխություններից հետո դա կվերանա: Բանակի վերաբերյալ տարիներ շարունակ քաղհասարակության բարձրացրած խնդիրները մինչ օրս մնում են անարձագանք, մասնավորապես՝ մարդու կյանքի իրավունքի հետ կապված խնդիրը, բուժսպասարկման, քրեական ենթամշակույթի, ոչ կանոնադրական հարաբերությունների և անգամ՝ զորակոչի ինստիտուտի հետ կապված խնդիրները: Այդ խնդիրների բարձրաձայնումը նյարդայնացնում է նաև այսօրվա իշխանություններին: Բազմիցս բարձրաձայնել ենք համակարգային խնդիրների մասին, և դրանց չլուծվելու պատճառով է, որ շարունակական են լինելու մահերը: Բնականաբար, իրավապաշտպանները պետք է իրենց գնահատականները տան՝ ինչպես նախկինում, այդպես էլ՝ այժմ: Եթե այդ գնահատականները չտանք, միանգամից թիրախավորվում ենք հակառակ կողմից՝ բա ինչո՞ւ էիք այն ժամանակ խոսում, հիմա լռում եք»:

Հիշեցնենք, որ ՊՆ փոխնախարար Գաբրիել Բալայանը լրագրողների հետ զրույցում ասել էր, թե իրավապաշտպաններից մի քանիսի մոտ, իր պատկերացմամբ՝ հրճվանք է առաջացնում բանակում ամեն ողբերգական դեպք. «Անգամ ունեմ տեղեկություն, որ այդ իրավապաշտպան կազմակերպությունները քայքայիչ գործողություն են իրականացնում: Նրանք փորձում են գնալ, տեղում հրահրել հարազատներին՝ որոշակի գործողություններ կատարելու համար: Կարծում եմ՝ շուտով իրավապահ մարմինները կսկսեն զբաղվել այդ դեպքերով»:

Հարցին՝ իրավապաշտպանների մի մասին հիմնականում մեղադրում են դրսից ֆինանսավորվելու և ապազգային գործունեություն ծավալելու համար, այս մեղադրանքներին ինչպե՞ս կհակադարձեք, և ըստ Ձեզ՝ ինչո՞ւ են նման մեղադրանքներ հնչում, Զարուհի Հովհաննիսյանը պատասխանեց.

«Գիտեք՝ պետք է հասկանանք, թե ինչ է նշանակում՝ մարդու իրավունքների պաշտպանություն: Դա իրապես ապազգային գործունեություն է, որովհետև մենք համամարդկային արժեքի հետ գործ ունենք: Կապ չունի՝ մարդն ազգությամբ հա՞յ է, թե՞ այլ երկրի ներկայացուցիչ է, մարդու իրավունքների պաշտպանները պետք է պաշտպանեն անհատի իրավունքը: Դրա համար ազգային հատկանիշ դնել մարդու իրավունքի պաշտպանի վրա՝ խորը մոլորություն է»:

Մանրամասները՝ 168TV-ի տեսանյութում