Ոստիկաններն ապօրինի ծառահատման հերթական դեպքն են բացահայտել
Ոստիկանությունը շարունակում է ապօրինի ծառահատումների դեմ պայքարը: Դեկտեմբերի 19-ին ոստիկանության Դիլիջանի բաժնի ծառայողները, ճանապարհային ոստիկանների ու բնապահպանության և ընդերքի տեսչական մարմնի Տավուշի տարածքային բաժնի աշխատակիցների հետ համատեղ, Դիլիջանի ոլորանների անշարժ պահակետում ծառայություն իրականացնելիս ստուգել են 6 խմ փայտանյութով բեռնված «Հինո-700» մակնիշի բեռնատար մեքենան: Վարորդը փայտանյութի օրինականությունը վկայող, որևէ փաստաթուղթ չի ներկայացրել, հայտնել է, որ փայտանյութը ձեռք է բերել Իջևանի վարչական տարածքում` անհայտ անձից: Մեքենան, փայտանյութով հանդերձ, տեղափոխվել է ոստիկանության Դիլիջանի բաժնի հատուկ պահպանվող տարածք: Նախապատրաստված նյութերը տարածքային կարգով ուղարկվել են ոստիկանության Իջևանի բաժին:
