Պեկինը բողոք է հայտնել Հոնկոնգի վերաբերյալ G7-ի ղեկավարների հայտարարության կապակցությամբ
Չինաստանը խիստ դժգոհություն եւ վճռական բողոք է հայտնում Հոնկոնգի իրադրության վերաբերյալ G7-ի ղեկավարների հայտարարության կապակցությամբ: Այս մասին հայտարարել է ՉԺՀ-ի արտաքին գործերի նախարարության պաշտոնական ներկայացուցիչ Գեն Շուանը:
Ավելի վաղ Ֆրանսիայի նախագահ Էմանուել Մակրոնն, ամփոփելով G7-ի՝ Բիարիցում կայացած գագաթնաժողովի արդյունքները, հայտարարել է, որ ղեկավարները քննարկել են Հոնկոնգի իրադրությունը եւ կոչ արել՝ խուսափելու բռնությունից:
«Մենք վճռական դժգոհություն եւ բողոք ենք հայտնում Հոնկոնգի վերաբերյալ G7-ի ղեկավարների անպատասխանատու հայտարարությունների կապակցությամբ»,- ճեպազրույցում հայտարարել է Գեն Շուանը:
Նա ընդգծել է, որ Հոնկոնգը Չինաստանի ներքին գործն է, եւ ոչ մի պետություն իրավունք չունի խառնվել այդ հարցին:
Նա հավելել է, որ Հոնկոնգում բռնի գործողությունները շարունակվում են արդեն ավելի քան երկու ամիս, դա ուժգին հարված դարձավ իրավունքի գերակայության, հասարակական կարգի համար: «Մենք ինքներս կարող ենք լուծել մեր հարցերը»,- ընդգծել է Գեն Շուանը, հաղորդել է ՌԻԱ Նովոստին:
