Կառավարությունը որոշել է՝ որքան գումար տրամադրել Մարտի 1-ից տուժածներին
2008 թ. մարտի 1-2-ը Երևան քաղաքում տեղի ունեցած իրադարձությունների ժամանակ առողջությանը միջին ծանրության վնաս ստացած անձանց միանվագ կհատկացվի 5մլն դրամ, առողջությանը ծանր վնաս ստացածին՝ 15մլն դրամ, իսկ ստացած վնասվածքի պատճառով զոհված (մահացած) անձի` ՀՀ քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձին՝ 30մլն ՀՀ դրամ։
Մարտի 1-2-ին տուժած անձանց աջակցության ձևը և չափը կառավարությունը կհաստատի առաջիկա նիստում՝ հուլիսի 18-ին։
Նախագծի ընդունումն անմիջականորեն ածանցվում է հունիսի 20-ին ուժի մեջ մտած «2008 թվականի մարտի 1-2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» ՀՀ օրենքից։ Տրամադրվող աջակցության ֆինանսավորումն իրականացվում է ՀՀ պետական բյուջեի միջոցներով, աջակցության տրամադրման համար դիմումները քննարկելու է ՀՀ արդարադատության նախարարությունը։
