Հայաստանում թմրամոլների թիվն այս տարի աճել է 6 տոկոսով
«Հայաստանում 2019թ. հունվարի 1-ի դրությամբ հաշվառված է 6951 թմրամոլ: Եթե համեմատենք մյուս տարիների հետ, ապա 2018թ. համեմատ թմրամոլների 6%-ի աճ ունենք: 2018թվականին 2017թ. համեմատ՝ ունեինք 9%-ով աճ»,- լրագրողների հետ հանդիպման ժամանակ ասաց Նարկոլոգիական հանրապետական կենտրոնի տնօրեն Պետրոս Սեմերջյանը:
Նրա փոխանցմամբ՝ 6951 հաշվառված թմրամոլներից 116-ը կանայք են, իսկ 3-ը՝ անչափահաս: Ինչ վերաբերում է տարիքային խմբին, ապա ամենաշատը 30-40 տարեկան մարդիկ են հաշվառված:
«Հաշվառված ասելով՝ նկատի ունենք այն, որ մարդիկ տարբեր պատճառներով հայտնվել են առողջապահության տեսադաշտում: Կա նաև ուրիշ վիճակագրություն. դրանք հետազոտություններն են: Թմրամոլների թիվը Հայաստանում որոշելու համար վերջին անգամ անցկացրել են 2011 թվականին: Պարզվել է՝ թմրամիջոց չարաշահում է մոտ 30.000 հոգի»,- հավելեց Պետրոս Սեմերջյանը:
Նրա փոխանցմամբ՝ Նարկոլոգիական հանրապետական կենտրոնում մարդը 100 տոկոսով բուժվում է, ազատվում կախվածությունից:
Նարկոլոգիական հանրապետական կենտրոնի տնօրենը նշեց՝ տարածաշրջանում Հայաստանի տվյալները համեմատաբար ավելի մեղմ են, օրինակ, հարևան Վրաստանում, ըստ ներկայացված տվյալների, 400000 հաշվառված թմրամոլ կա, իսկ Իրանում՝ մոտ 3 մլն:
Անի Կարապետյան
