Իսկ ո՞վ է ասել, որ հասարակական կազմակերպության անդամը պետք է կռված տղա լինի. ԵԿՄ-ականները՝ Կոռնիձորի Արոյին

«ԵԿՄ համագումարին գրեթե ոչինչ չէր փոխվել, կազմը՝ օլիգարխիկ համակարգով, կառավարության ներկայացուցիչներով»,- այս մասին ապրիլի 8-ին լրագրողների հետ զրույցում ասաց«Կոռնիձոր» ջոկատի հրամանատար Արա Խուդավերդյանը (Կոռնիձորի Արո):

Նա նշել էր, որ համագումարին հազիվ թե 10 տոկոս ազատամարտիկ լիներ:

«Աղքատ երկրապահների ներկայացուցիչները գտնվում էին դահլիճի հետևում, կառավարության անդամները, պետական այրերը գտնվում էին դահլիճի առջևում: Սա համագումար էր հապճեպության մեջ՝ հանրապետականի ոգով, «մանվելիզմի» կիրառմամբ: Այսինքն, ոչինչ չի փոխվել, ոչինչ չի փոխվում՝ անկախ ներկաներից կամ բացականերից»,- ասել էր նա։

Արա Խուդավերդյանը նշել էր նաև, որ ազատամարտիկներն իրեն առաջադրել էին՝ որպես ԵԿՄ վարչության նախագահի թեկնածու, սակայն ինքը և իր համախոհները դուրս են մնացել մանդատների վերաբաշխումից։ Ըստ նրա՝ դիմել են ԵԿՄ-ին, որպեսզի իրենց տրամադրվի 50 մանդատ, բայց ոչինչ չեն ստացել:

ԵԿՄ անդամները 168.am-ի հետ զրույցում ասացին, որ նրան ու թիմակիցներին բազմիցս են հորդորել՝ գնալ և դիմել տարածքային բաժանմունքներ, ձևակերպվել՝ որպես ԵԿՄ-ական, որպեսզի համագումարից առաջ տեղի ունեցող ընդհանուր ժողովների ժամանակ ընտրվեն՝ որպես պատվիրակներ:

«Նամակ է գրել, թե ինձ հասանելիք 50 մանդատը տվեք, իսկ ո՞վ է ասել, որ 50 է, կարող է՝ ավելի շատ էր կամ ավելի քիչ: Ընթացակարգը նախաձեռնող խումբն է որոշել: Ինչ վերաբերում է նրան, թե մանդատ ունեցողներից 10 տոկոսն է պատերազմի մասնակից, ապա նման հերյուրանք, չէինք պատկերացնում, որ կլսենք: Իհարկե, հնարավոր է, որ մանդատ ունեցողների մեջ չկռված տղաներ լինեն, իսկ ո՞վ է ասել, որ հասարակական կազմակերպության անդամը պետք է կռված տղա լինի: Մենք ասում ենք՝ եռասերունդ երկրապահ, չէ՞, բա պատանի կամ երիտասարդ երկրապահըպարտադիր պետք է կռված լինի: Դրա համար կռված տղաներին տալիս են մասնակցի կարգավիճակ, որը օգտվում է մի շարք արտոնություններից՝ անվճար ստուգում, բուժում, վիրահատություն և այլն, իսկ մյուսները չեն կարող այս ամենից օգտվել. հիմա տարբերություն եղա՞վ, թե՞ չեղավ, իհարկե՝ եղավ»,- մանրամասնեցին ԵԿՄ անդամները:

Հիշեցնենք, որ ԵԿՄ 12-րդ արտահերթ համագումարի կողմից ընտրված վարչության կազմը ապրիլի 7-ին անդրանիկ նիստ անցկացրեց, և միաձայն ԵԿՄ վարչության նախագահընտրվեց Սասուն Միքայելյանը։

Ընտրվեց նաև 25 հոգուց բաղկացած վարչության կազմը՝ նախկին 186 հոգու փոխարեն։

Անի Կարապետյան