Զելենսկին բացահայտել է Դոնբասի իրադրության կարգավորման իր ծրագիրը
Ուկրաինայի նախագահի թեկնածու Վլադիմիր Զելենսկին պատմել է Դոնբասի իրադրության կարգավորման՝ իր ծրագրի մասին: Նա այդ մասին հայտարարել է «Ուկրաինա» հեռուստաալիքի եթերում: Զելենսկու խոսքով՝ առաջին հերթին, անհրաժեշտ է արագորեն հասնել հրադադարի:
«Մենք չենք կարող մեզ երկարատեւ գործընթաց թույլ տալ, որովհետեւ ամեն օր մենք առավոտն սկսում ենք այն մասին նորություններով, թե մեր տղաներից քանիսն են զոհվել արեւելքում»,- հայտարարել է նա: Նաեւ շոումենը կարեւորել է ինքնահռչակ հանրապետությունների տարածքներում «յուրաքանչյուր մարդու հետ փոխըմբռնման հասնելու» անհրաժեշտությունը:
Դրա համար նա, մասնավորապես, նշել է կենսաթոշակային վճարների վերականգնման կարեւորությունը: Ապրիլի 7-ին Զելենսկին հայտարարել է, որ պատրաստ է բանակցություններ վարել Ռուսաստանի նախագահ Վլադիմիր Պուտինի հետ: Նա ճշտել է, որ կարեւոր է համարում Մոսկվայի հետ երկխոսություն վարել «արեւմտյան ներկայացուցիչների ներկայությամբ»:
«Մենք երբեք տարածքներ եւ մարդկանց չենք զոհաբերի: Ուկրաինայի ամբողջականությունը պետք է հաստատուն լինի»,- ամփոփել է նա: Ուկրաինայի նախագահի ընտրությունների առաջին փուլը կայացել է մարտի 31-ին: Դոնբասում քվեարկությունը տեղի է ունեցել սոսկ Կիեւի վերահսկած տարածքներում, հաղորդել է ՌԻԱ Նովոստին:
