Վիրահայոց թեմի առաջնորդը հեռանում է պաշտոնից. եպիսկոպոսը կվերադառնա Հայաստան. Jnews
Վրաստանի Հայ Առաքելական Եկեղեցու Հայոց թեմի առաջնորդ Վազգեն եպիսկոպոս Միրզախանյանը սեփական ցանկությամբ լքում է զբաղեցրած պաշտոնը: Այս մասին նա հայտարարեց Սամցխե-Ջավախքի և Ծալկայի ընդհանուր առաջնորդական նորանշանակ փոխանորդի ներկայացման ժամանակ:
«Ուզում եմ պաշտոնապես հայտնել, որ վերադառնալու եմ Հայաստան և իմ հոգևոր ծառայությունը Էջմիածնում շարունակելու: Ուզում եմ շնորհակալություն հայտնել և ասել՝ սա պաշտոնապես իմ վերջին այցն է Սամցխե-Ջավախք և մոտ ժամանակներում Վիրահայոց թեմը նոր առաջնորդ կունենա»,- հայտարարեց Վիրահայոց թեմի առաջնորդ Վազգեն եպիսկոպոս Միրզախանյանը:
Թեմակալ առաջնորդը Սամցխե-Ջավախքի փոխանորդի նշանակումը համարում է իր 17 տարիների աշխատանքի կարևորագույն դրվագներից մեկը: Նա իր հոգևոր ծառայությունը Վիրահայոց թեմում արգասաբեր է գնահատում:
Jnews-ի հետ զրույցում թեմակալ առաջնորդը նշեց, որ այս փոփոխությունը որևէ անձնական կամ այլ նկատառում չունի:
«Սա իմ ցանկությունն է, սա Վիրահայոց թեմի առաջնորդի ցանկությունն է, որին ընդառաջում է Հայոց կաթողիկոսը: Այս ամբողջը մեկ բացատրություն ունի, ինչպես 2001 թվականին նշանակվեցի այստեղ ծառայության, առանց որևէ բացատրության, այնպես էլ հիմա ծառայության եմ կոչվում Մայր Աթոռ Սուրբ Էջմիածին»,- ասաց սրբազանը:
Առաջիկայում, երբ նոր առաջնորդ ծառայության կոչվի Վիրահայոց թեմ, Վազգեն եպիսկոպոս Միրզախանյանը կտեղափոխվի Հայաստան:
Աղբյուրը՝ jnews.ge
