ՄԱԿ-ը կոչ է անում միանալ Երկրի ժամին

Ամբողջ աշխարհում մարտի 30-ին տեղական ժամանակով երեկոյան 8.30-ին նշվելու է Երկրի ժամը։ ՄԱԿ-ը կոչ է անում միանալ այս համաշխարհային շարժմանը՝ դիմակայելու Երկրի առաջ ծառացած կլիմայական փոփոխության մարտահրավերներին և պաշտպանելու մեր մոլորակը կործանման վտանգից։ Այս մասին տեղեկացրին ՄԱԿ-ի Հայաստանի գրասենյակի հաղորդակցության վարչությունից։

«Կլիմայի փոփոխությունը շատ ավելի արագ է առաջ շարժվում, քան մենք: Ամբողջ աշխարի ռեսուրսներն ու էկոհամակարգերը հարձակման տակ են։ Երկրի ժամը հնարավորություն է ցույց տալու մեր վճռականությունը։ Անջատելով լույսերը՝ միացնում ենք առողջ մոլորակի լույսը»,- Երկրի ժամվա կապակցությամբ նշել է ՄԱԿ-ի Գլխավոր քարտուղար Անտոնիու Գուտերեշը։

«Մենք առաջին սերունդն ենք, որ գիտակցաբար կործանում է երկիր մոլորակը և կարող ենք լինել վերջինը, ով կկարողանա կանխել դա։

Առաջիկա շաբաթը օրը՝ մարտի 30-ին, արդեն 12-րդ տարին է, որ տեղական ժամանակով երեկոյան 8.30-ին նշվում է Երկրի ժամը: Շրջակա միջավայրի համար աշխարհի խոշորագույն շարժումը մեկ տարով էլ է մեծանում և շարունակում է համախմբել միլիոնավոր մարդկանց մասնակցելու ամենամյա տոնակատարությանը: «Երկրի ժամի» 2019 թ. «#Միացեք Հանուն Երկրի» քարոզարշավի նպատակն է զանգվածային ձևով իրազեկել այն մասին, թե ինչու է բնությունը կարևոր և ստեղծել շարունակական շարժում հանուն բնության, այնպես, ինչպես աշխարհը համախմբվեց պայքարելու կլիմայի փոփոխության դեմ:

Երկրի ժամը համաշխարհային շարժում է, որը կազմակերպվում է Բնության համաշխարհային հիմնադրամի (WWF) կողմից: Միջոցառումն անցկացվում է ամեն տարի՝ ամբողջ աշխարհում խրախուսելով անհատներին, համայնքներին,ընկերություններին և տնային տնտեսություններին մարտի վերջին որևէ հատուկ օր մեկ ժամով անջատել ոչ առաջնային օգտագործման էլեկտրական լույսերը երեկոյան ժամը՝ 8: 30-ից մինչև 9: 30-ը։ Միջոցառումն աջակցում է կլիմայի փոփոխության դեմ պայքարին և վկայում է ավելի լավ մոլորակի հանդեպ մեր նվիրվածության մասին: Նախաձեռնությունն սկսվել է 2007 թվականին Սիդնեյում (Ավստրալիա)՝ որպես «լույսերի անջատում» միջոցառում: Այդ ժամանակից ի վեր միջոցառմանը միացել են ավելի քան 7000 քաղաք և 172 երկիր (https://www.earthhour.org/)։

Երկրի ժամը տարբեր է Երկրի օրվանից, որը ՄԱԿ-ի հիշարժան օր է և ամեն տարի նշվում է ապրիլի 22-ին: Ամբողջ աշխարհում տարբեր միջոցառումներ են անցկացվում հանուն շրջակա միջավայրի պահպանության: Երկրի օրն առաջին անգամ նշվել է 1970 թ. և այժմ ավելի քան 193 երկրներում օրվան նվիրված տարբեր միջոցառումները համակարգում է «Երկրի օրվա ցանց»-ը: Այս կերպ մենք երախտիքն ենք հայտնում երկիր մոլորակի հանդեպ՝գործի դնելով այն բոլոր եղանակները, որով կարող ենք աջակցել պահպանելու մեր մոլորակի գեղեցկությունն ու պահպանելու դրա մեծածավալ ռեսուրսները»,- նշված է հաղորդագրության մեջ: