Միքայել Մելքումյանն առաջարկում է դիմել ԵԱՏՄ-ին՝ ՀՀ-ի համար ավտոմեքենաների մաքսատուրքերը երրորդ երկրներից չբարձրացնել առաջիկա 5 տարիներին
ԵԱՏՄ մաքսազերծման արտոնություններից զրկվող ամենամասսայական ոլորտը լինելու է ավտոմեքենաների ներկրման ոլորտը։ Այս մասին այսօր ԱԺ Տարածաշրջանային և եվրասիական ինտեգրման հարցերի մշտական հանձնաժողովի նիստում հայտարարեց հանձնաժողովի նախագահ Միքայել Մելքումյանը՝ նշելով, որ 2017 թ.-ին երրորդ երկրներից ՀՀ է ներկրվել 37710 ավտոմեքենա, 2018-ին՝ 65110։
Ըստ նրա՝ 2020 թ. հունվարի 1-ից մեքենաների մաքսազերծումը լինելու է ոչ թե հայտարարագրված արժեք, հավելած 10% մաքսատուրք, այլ՝ շարժիչի հզորությամբ։ Մ.Միքայելյանի հաշվարկով՝ սա հանգեցնելու է նրան, որ առնվազն 4-5 անգամ ավելանալու են այդ մեքենաների արժեքները. «Պատահական չի, որ այս մեծ թվերի մեջ, Հայաստանում այսքան պահանջարկ չկա, դեպի Ղազախստան և Ռուսաստան գնացող մեքենաներն են։ Եվ երրորդ երկրներից ներկրվող մեքենաների մասով մենք շահում ենք մաքսատուրքերի մասով, որովհետև սա ընդհանուր կաթոսայով չի գնում, այլ երրորդ երկրներից է»։
Մ.Մելքումյանը նկատեց, որ ՀՀ-ն պասիվ է և հարցադրումներ չի անում միությանը, ու առաջարկեց դիմել ԵԱՏՄ-ին, որ ՀՀ-ի համար ավտոմեքենաների մաքսատուրքերը երրորդ երկրներից չբարձրանան առաջիկա 5 տարիներին։
Ըստ նրա՝ շատ է բարձրանալու նաև ընտանի թռչնամսի, ցորենի, արևածաղկի ձեթի մաքսատուրքերը։
ՀՀ տնտեսական զարգացման և ներդրումների նախարար Տիգրան Խաչատրյանը լրագրողների հետ զրույցում նշեց, որ խորհրդարանականների առաջարկները գործադիրը կարող է հիմք վերցնել՝ ԵԱՏՄ գործընկերների հետ բանակցելու համար։ Սակայն, ըստ նրա, արտոնյալ բոլոր ժամկետներն էլ մի օր ավարտվում են։
