«Բարսելոնա»-«Տոտենհեմ». հյուրերը դուրս կգա՞ն հաջորդ փուլ

Չեմպիոնների լիգայի խմբային փուլի վերջին տուրի գլխավոր հանդիպումներից մեկը կանցկացվի «Կամպ Նոու» մարզադաշտում, որտեղ «Բարսելոնան» հյուրընկալելու է «Տոտենհեմին»:

«Բարսելոնա»

«Բարսելոնայի» համար «Տոտենհեմի» հետ խաղն այլևս մրցաշարի արժեք չունի: Կատալոնական ակումբն արդեն երաշխավորել է իր առաջին տեղն այս քառյակում և կխաղա Չեմպիոնների լիգայի փլեյ օֆֆում: Հինգ տուրերում «կապտանռնագույնները» վաստակել են 13 միավոր և վեց միավորով  շրջանցել են ամենամոտ մրցակցին:

Հանգստյան օրերին Էռնեստո Վալվերդեի սաները հաղթեցին կատալոնական դերբիում 4:0 հաշվով: Սա կատալոնացիների 4-րդ անընդմեջ հաղթանակն էր: Ընդհանուր առմամբ, այս մրցաշրջանի 23 խաղերում կատալոնացիները պարտվել են միայն 2 անգամ:

«Բարսելոնայում» վնասվածքներ ունեն Սերժի Ռոբերտոն, Մալկոմը և Ռաֆինյա Ալկանտարան: Հարցականի տակ է Սամուել Ումտիտիի մասնակցությունը:

«Տոտենհեմ»

«Տոտենհեմի» համար խմբում տիրող իրավիճակը շատ ավելի բարդ է: Չնայած նրան, որ անգլիական ակումբը խմբում երկրորդն է, միայն կատալոնացիներին հաղթելն է երաշխավորում նրանց տեղը փլեյ օֆֆում: Մաուրիսիո Պոչետինոյի սաներն իրենց ակտիվում ունեն 7 միավոր: Նույնքան միավոր ունի նաև «Ինտերը», ով վերջին տուրում սեփական հարկի տակ խաղալու է ՊՍՎ-ի հետ: Իտալացիները դժվար թե այս խաղում բաց թողնեն հաղթանակը:

ԱՊԼ-ի վերջին տուրում «Տոտենհեմը» 2:0 հաշվով հաղթեց «Լեսթերին»: Սա 8-րդ հաղթանակն էր վերջին 9 պաշտոնական խաղերում:

Այս խաղում հստակ չեն խաղա Դավինսսոն Սանչեսը, Մուսա Դեմբելեն և Վինսենտ Յանսենը: Հարցականի տակ է Կիրիան Թրիփերրի, Սերժ Օրիեի, Էրիկ Լամելիայի և Վիկտոր Վենյամայի մասնակցությունը:

Վիճակագրություն և անձնական հանդիպումներ

• «Բարսելոնան» Չեմպիոնների լիգայի վերջին 7 խաղերում չի պարտվել
• Վերջին 8 խաղերում հյուրընկալվելիս «Տոտենհեմը» հաղթել է երկու անգամ և չորս անգամ ոչ-ոքի է խաղացել
• Կատալոնական ակումբն այս մրցաշրջանում սեփական հարկի տակ հաղթել է 11 խաղերից 8-ում
• Թիմերն իրար հանդիպել են երեք անգամ: Երկու խաղերն ավարտվել են ոչ-ոքի՝ 1:1 և 2:2 հաշիվներով: Մեկ խաղում հաղթել են կատալոնացիները՝ 4:2:

Այս խաղում անգլիական ակումբը պետք է անի ամեն ինչ չպարտվելու համար: «Ինտերը» դժվար թե բաց թողնի հաղթանակը, այնպես որ, «Տոտենհեմը» հաղթելու խնդիր է ունենալու:

Կատալոնական ակումբը ոչ մի խնդիր չունի լուծելու այս խաղում, այնպես որ, հավանական է, որ դուրս գա ոչ մեկնարկային կազմով: Կատալոնացիները ոչ մի դեպքում չեն զիջի առաջատարությունը և արդեն իսկ մտածում են փլեյ օֆֆի մասին:

Հիշեցնենք, որ Չեմպիոնների լիգայի խմբային փուլի  «Բարսելոնա»-«Տոտենհեմ» հանդիպումը կկայանա այսօր՝ կեսգիշերին:

Սիրարփի Աղաբաբյան