ՌԴ նախագահի խորհրդականը՝ ԵԱՏՄ կազմում Ադրբեջանի հայտնվելու և ԼՂ հակամարտության կարգավորման կապի մասին
Ռուսաստանի նախագահի խորհրդական Սերգեյ Գլազևն այսօր Երևանում կայացած մամուլի ասուլիսի ժամանակ ակնարկել է, որ ղարաբաղյան հակամարտության համատեքստում Ադրբեջանի անդամակցությունը ԵԱՏՄ-ին հնարավոր է։ Ս. Գլազևի խոսքով՝ ԵԱՏՄ-ն բաց է բոլորի համար։
Ըստ նրա՝ բոլոր հետխորհրդային երկրների մուտքը Եվրասիական տնտեսական միություն կկրճատի հակամարտությունների քանակը:
«Եթե ԵԱՏՄ-ն ընդգրկի հետխորհրդային տարածքի բոլոր երկրները, ապա հակամարտություն շատ քիչ կլինի։ Մեր դիրքորոշումն այն է, որ հետխորհրդային տարածքներում հակամարտությունները պետք է լուծվեն բանակցությունների, խորհրդակցություններ և փոխզիջումների միջոցով։ Մենք շահագրգռված ենք, որպեսզի հակամարտություններ չլինեն»,- ղարաբաղյան կարգավորման մասին հարցին ի պատասխան՝ ասել է նա։
Հիշեցնենք, որ հայաստանյան, ադրբեջանական և ռուսական ԶԼՄ-ներում բազմիցս հրապարակվել է Ադրբեջանի՝ ԵԱՏՄ հնարավոր մուտքի, ինչպես նաև ՀԱՊԿ անդամակցության մասին։
ՀՀ ԱԳՆ-ից լրագրողներին այդ կապակցությամբ պատասխանել էին, որ ինչպես՝ ՀԱՊԿ-ի, այնպես էլ՝ ԵՏՄ-ի դեպքում որոշումները կայացվում են կոնսենսուսի հիման վրա. «Այդ առումով մենք մեր դիրքորոշումը հայտնել ենք։ Եթե նման հարց դիտարկվի, Հայաստանը կօգտագործի վետոյի իր իրավունքը»։
