«Մենք ստացել ենք հրահանգ՝ չթիրախավորելու և պահպանելու հրադադարի բոլոր պայմանավորվածությունները». Դավիթ Տոնոյան
Նիկոլ Փաշինյան-Իլհամ Ալիև կարճատև հանդիպումից և պայմանավորվածությունից հետո հայ-ադրբեջանական սահմանին հրադադարի խախտման դեպքերը նվազել են, իսկ այսօր գրանցվել է ամենացածր վիճակագրությունը։ Այս մասին այսօր կառավարության նիստից հետո լրագրողների հետ զրույցում ասաց ՀՀ պաշտպանության նախարար Դավիթ Տոնոյանը։
«Մենք ստացել ենք հրահանգ՝ չթիրախավորելու և պահպանելու հրադադարի բոլոր պայմանավորվածությունները։ Եվ դա մենք իրականացնում ենք»,- ասաց նախարարը։
Թե ինչպե՞ս կանդրադառնա Նիկոլ Փաշինյանի հրաժարականը սահմանային լարվածության վրա, Դ.Տոնոյանը նշեց, որ այս պահին հայկական կողմը հրադադարը պահպանում է, և, եթե լինեն փոփոխություններ հակառակորդի կողմից, կամ ինչ-որ իրավիճակի փոփոխություն լինի մեր ներքաղաքական իրավիճակի հետ կապված, Զինված ուժերն իր առջև դրված առաջադրանքը կատարելու է. «Իրավիճակից ելնելով՝ մենք որոշումներ կկայացնենք»։
